ot 1. Mendeleyev davriy sistemasining VIII guruhiga mansub kimyoviy element, bolgʻalanganda yassilanadigan, istalgan shaklga kiradigan, uglerod bilan qoʻshilganda, poʻlat va choʻyan hosil qiladigan qoramtir kumush rangli ogʻir metall.
Sof temir.
Magnit ham temirni domiga tortadi, kesakni torta olmaydi. — P. Qodirov, Uch ildiz
Uning [Qoratoyning] oʻn uch yashar oʻgʻli dam bosib, kichik bolgʻa bilan temirni urib, dadasiga yordamlashardi. — Oybek, Tanlangan asarlar
2. s. t. Umuman, temir, poʻlat va shu kabilar va ulardan yasalgan buyum-narsalar.
Temir qoshiq. Temir koʻprik. Temir panjara. Temir oʻchoq. Temir darvoza.
Yigit uzoqda haybatli temir uyumlari singari agʻnab yotgan pachoq parovozlarga tikildi. — Oybek, Quyosh qoraymas
Samolyotning kichkinagina zinapoyasiga bir oyogʻimni qoʻyib, eshigidan ushlagan edim, qoʻllarim temirga chip etib yopishib qolsa boʻladimi! — N. Fozilov, Diydor
- Temir daftar Bularning hammasi uning boʻynida qarz boʻlib yotardi. Bulardan tashqari, otasining dafn xarajatlari ham temir daftarda yozigʻliq edi. — M. Ismoiliy, Fargʻona tong otguncha
- Temirni qizigʻida bosmoq Har ishni oʻz vaqtida, fursatni boy bermay amalga oshirmoq. Temirni qizigʻida bos degan maqolga amal qilib, unga madh-sano oʻqishga boshladi. — Oybek, Navoiy