Қидирув

фл. 1. Тароқ ёки бошқа бирор нарса билан соч, соқол ва шу кабиларнинг чигилини ёзмоқ, текисламоқ.

Шундан кейин сочларини бир томонга силлиқ тараган тилла тишли йигит қўл кўтарди. — Н. Аминов, Суварак

Отам ўйланиб қолди. Соқолини бармоқлари билан таради. — Ойдин, Садағанг бўлай, командир

Қоронғида сокин турган отнинг бўйнидан қучоқлади, бармоқлари билан ёлини таради. — Ойбек, Танланган асарлар

2. қ. х. Ариқ-жўякларга сувни бир меъёр-да тақсимлаб оқизмоқ, таратмоқ.

Жўяк олинган жойларда тажрибакор сувчилар чанқаган ғўзаларга сув тарардилар. — Ш. Рашидов, Бўрондан кучли

Шермат ота икки гектарлик картага сув тараб бўлди-да, эгатларни кўздан кечириб, ўқариқ бўйига чиқди. — Ҳ. Нуъмон, Фасллар

3. кўчма поет. Ёймоқ, сочмоқ.

Қорли тоғлар орқасидан Атлас сочин тараб қуёш, Гоҳ мўралаб, ўйнатар қош, Ханда сочар дудоғидан. — Ғайратий

фл. 1. Тарамоқ 1, 2 феълларининг мажҳул ва ўзлик нисбатлари.

Сув ҳамма эгатга баравар таралади.

Ўрмонжон шошиб чиқиб кетди ва бирон соатдан кейин озғин, сочи ўнг томонга жуда ҳафсала билан таралган ёшгина бир йигит билан кириб келди. — А. Қаҳҳор, Қўшчинор чироқлари

2. Ёйилмоқ, тарқалмоқ.

Қайси бир узун қулоқ орқали бу гап қамиш тўзғоғидай таралиб кетди. — Ҳ. Назир, Ўтлар туташганда

Кумушбиби бошловчи қизлар билан уйга кирди, ундан таралган атир ислари билан уй тўлди. — А. Қодирий, Ўтган кунлар

Ўн икки ўғил-қизли ота-онанинг донғи бутун мамлакат бўйлаб таралди. — Р. Файзий, Шоҳи дарпарда

3. Ҳар томонга кетмоқ, тарқалмоқ.

Азизлар мусиқий асбобларни қучоқлаб, қўрқа-писа, ғинг демасдан, ҳар ёққа таралдилар. — Ойбек, Навоий

Чипор товуқ ҳам зўр ташвиш билан қақағлаб, таралиб юрган жўжаларини қаноти остига чақирарди. — А. Муҳиддин, Оташ қалбли қиз

от Беғам-беташвиш айш қилиб юриш; шу тарздаги хурсандчилик, гашт.

Тўй бўлса, сизга нима ғам, аяжон? Сиз ҳам тараллани ванг қўйиб юравермайсизми? — Ҳамза, Бой ила хизматчи

Ўйнаб-кулиб, тараллангни тортиб юравер. Сенга чурқ этадиганнинг боши ўнта. — Ғ. Ғулом, Шум бола

Қурилиш раҳбарлари эса парвойи палак. Бўлса бўлар, бўлмаса ғовлаб кетар, деб тараллани ванг қилиб юришибди. — Муштум

фл. Таралмоқ феълининг биргалик нисбати.

фл. Таралмоқ феълининг орттирма нисбати.

сфт. Беғам-беташвиш айш қилиб юриш; хурсандчилик, гашт (шу тарзда юрадиган шахсларга нисбатан қўлланади).

Таралабедод қилиб юрмоқ.

Қачон кўрсанг, таралабедод, хурсанд, хушчақчақ. — Шуҳрат, Шинелли йиллар

Бировларнинг севгисини хор қилиб, бошқа ёр топиб, тараллабедод қилиб юрувчиларнинг адабини бериб қўйиш керак. — Б. Раҳмонов, Юрак сирлари

— Асадни ёшлигидан билгандим. Ширинтомоқ, маишатга суяги ёʻқ, тараллабедод, — деди Камол. — Ҳ. Назир, Кўктерак шабадаси