Қидирув

от 1. Иссиқлик манбаи ёки қизиб турган нарсадан ураётган иссиқ, ҳарорат.

Тандирнинг тафти. Оловнинг тафти. Гулхан тафтида исинмоқ.

Кеч кириб, ҳавонинг тафти қайтди. — С. Аҳмад, Қадрдон далалар

Мовий осмон тиниқ ва беғубор, ҳали тахтга минмаган қуёшнинг тафти баданни куйдирмайди. — Ф. Мусажонов, Ҳиммат

2. Иссиқликдан кўтарилаётган буғсимон нарса; ҳовур.

Эгатлардан жимир-жимир тафт кўтарилади. Қушлар кўринмайди. — С. Нуров, Нарвон

3. кўчма Шахс ёки нарсанинг ҳарорат даражаси ҳолати; температура.

Сувнинг тафтини билгиси келди шекилли, ғўдир бармоқларини ботирди. — Р. Раҳмонов, Восил ака

Шу тариқа тажриба ҳам тўплана борди, чўл ерларининг тафти, маромини ҳам ўрганиб олишди. — Газетадан

4. кўчма Ижобий таъсирли, ҳаётбахш ҳарорат, ўт.

Ҳовлида одам борки, жон бор. Девордан тортиб дов-дарахтгача ошхонадан тортиб донхонагача, рўзғор буюмларигача — бари одам тафти билан тирик. — Р. Файзий, Ҳазрати инсон

Бу сатрларнинг тафтидан Зуҳра бегимнинг қалбига яна иссиқлик югурди. — П. Қодиров, Юлдузли тунлар

5. кўчма Киши руҳидаги ёқимсиз ҳолат, ғубор.

Овқатдан олдин ювиниб чиқасизми — совуқ сув одамнинг тафтини босади. — А. Қаҳҳор, Аяжонларим

Одам тафтини одам олади, деганлари шу-да, иним. — Р. Раҳмон, Меҳр кўзда

Диққати ошиб, дили қоронғи бўлиб кетган кезларида челакни шафтолига тўлдириб, ётоғимизга келиб қолади. Бизни койиб-койиб, тафтини ёзиб кетади. — С. Аҳмад, Онажонлар

6. кўчма Ўзини юқори олиш, манманлик кайфияти.

Ҳалима ўша Ойжамол опа келиб кетгандаги можародан кейин анча тафтидан тушган, ўзгара бошлаган эди. — Ж. Абдуллахонов, Гулчеҳра

от 1. эск. Бўлиб ўтган иш, ҳодиса ва шу кабилар юзасидан ёки ҳақиқий аҳволни аниқлаш мақсадида ўтказиладиган текширув, тергов, сўроқ, ревизия.

Режали йиллик тафтиш. Тафтиш комиссияси.

[Навоий:] Тафтишлар шуни кўрсатадики, Ёдгорбек қўзғолонида бу одамнинг ҳам қўли бўлган. Уйғун ва И. — Султон, Алишер Навоий

Ўғлингиз сиздан яшириб, Ҳамза ҳожининг бедин мактабига қатнармиш деб эшитаман, шу ростми? — Тафтиш қилдим, тақсир, қатнар экан. — К. Яшин, Ҳамза

2. эск. Қидирув, тинтув.

Ўғрилар тутил-син, дорга осилсин! Ҳар бир хонадон тафтиш қилинсин. — Ж. Шарипов, Хоразм

3. Бирор муассаса ёки мансабдор шахснинг молиявий-хўжалик фаолиятининг тўғрилиги, қонунийлигини аниқлаш мақсадидаги текширув.

Биринчи тафтиш юзаки ўтказилгани ҳақида эътирозлар туғилгач, республика агросаноат комитетидан мутахассис чақиришди. — Муштум

от Тафтиш қилувчи, текширувчи.

Халқ назорати постидагилар Илҳомчанинг эгри қўллиги ҳақида милицияга сигнал беришибди. Аммо тафтишчилар келганда, Илҳомча аллақачон қочиб улгурган эди. — Ҳ. Ғулом, Сенга интиламан

Пихи қайрилган тафтишчилар қасд қилганда ҳам, бирон марта камомад тополмаганлар. — Й. Шамшаров, Тошқин

фл. Тафтиш қилмоқ.

фл. Тафтишламоқ феълининг мажҳул нисбати.

русчаназначение ревизииинглизчаassignment of audit