Qidiruv

ot 1. Davlat hokimiyati shakllarini amalga oshirish va boshqarish; davlat hokimiyatining mamlakatni boshqaruvda va xalqaro munosabatlarda tutgan yoʻli; davlatni boshqarish sanʼati.

Ichki siyosat. Tashqi siyosat.

Mustaqillik tufayli Oʻzbekiston Respublikasining davlat siyosati yangicha maʼno va mazmun kasb eta boshladi. — OʻzME

Bu kungi sharoit tajribali xonni boshqacha siyosat ushlashga majbur etdi. — A. Qodiriy, Mehrobdan chayon

2. koʻchma Hiyla-nayrangga asoslangan, yoʻliga qilingan ish, xatti-harakat; ustomonlik.

Shu joyda raisning obroʻsi sal darz ketibdi. U oʻzining biyligini siyosat bilan oʻtkazmoqchi boʻlgan ekan-u, boʻlmabdi. — N. Fozilov, Diydor

Dehqon, kosib xalqi notinchlanib qoldi: albatta, ularning bolalari ketadi-da, farmonda mardikor deyilgan, ammo, Salim aka, menimcha, bu narsa bir siyosat, bir aldov boʻlsa kerak. — Oybek, Tanlangan asarlar

3. s. t. Doʻq, poʻpisa, qoʻrqituv.

[Navoiy:] Tahdid va siyosat emas, mehribonlik darkor. — Oybek, Navoiy

[Beklar:] Siyosat uchun bitta igʻvogarning boshini kestirmoq zarur! — P. Qodirov, Yulduzli tunlar

Ha, odamlar aytar edi, Azroil jon oladigan boʻlganda, shunday siyosat bilan, haybat bilan keladi, deb. — Murodxon

sft. 1. Siyosatga oid, siyosat bilan bogʻliq boʻlgan, siyosat sohasidagi.

Siyosiy masala. Siyosiy partiya. Siyosiy sharhlovchi.

Mustaqil Oʻzbekiston siyosiy partiyalarning shakllanishi va faoliyati uchun zarur shart-sharoitlarni yaratib berdi. — Mustaqillik lugʻati

2. Davlatga, davlatchilikka va fuqarolik haq-huquqiga oid.

Siyosiy tuzum. Siyosiy huquq. ™

Oʻzbekiston Respublikasining siyosiy tuzumi 1992 yil 8 dekabrda qabul qilingan Konstitutsiyam, shu asosda qabul qilingan konstitutsiyaviy qonunlar hamda boshqa rasmiy hujjatlar bilan belgilangan. — Mustaqillik lugʻati

sft. Gapi oʻtkir, gapini oʻtkaza oladigan, haybatli, oʻz salobati, teran fikri, qattiqqoʻlligi bilan kishilarni hayiqtiradigan.

Siyosatli boshliq.

Bir haybatli, siyosatli narsalar ekan. Bular bilan olishib boʻlmasa kerak. — Yodgor

ot Siyosat bilan shugʻullanuvchi, siyosatdon, siyosat arbobi.

Siyosatchilar nega siyosiy partiyalar faoliyati haqida fikr bildirmayaptilar? — Gazetadan

ot Siyosat bilan shugʻullanadigan, siyosatni yaxshi biladigan, tushunadigan; siyosatchi.

Siyosatdon odam.

Siz, aytaylik, xorijiy mamlakat bilan muzokara olib boradigan diplomat yoki siyosatdonsiz. — Fan va turmush

Xullas, atoqli shoir, siyosatdon, bastakor va tarjimon Komil ijodi adabiyotimiz tarixidan mustahkam oʻrin egallagan. — OʻTA

ot Quruq siyosat bilan ish tutish, siyosat soʻqish, safsatabozlik.

Siyosatbozlik qilish.