ot 1. fls. Narsa, voqea, hodisa va shu kabilarni ularning oʻziga xos belgi va ichki xususiyatlariga koʻra ifodalovchi falsafiy tushuncha.
Miqdorning sifatga aylanishi.
2. Narsaning, kimsaning ijobiy yoki salbiy xususiyati, fazilati, xislati.
Inson sifatlari ichida kamtarlik eng yaxshi fazilatdir. — Gazetadan
Navoiy Husayn Boyqaroda shoirlik, ilmparvarlik sifatlarini koʻrdi. — Oybek, Navoiy
[Domla oʻz-oʻziga:] Hurmatli kitoblarda aytadilar: Sabrlilik — xudoning oyati, sabrsizlik — shaytonning sifati. Shularga amal qilib, bir oz sabr qolmoq kerak. — Hamza, Tanlangan asarlar
3. Molning, mahsulotning yoki ishning yaroqlilik darajasi, qoʻyilgan talablarga qanchalik javob bera olishini belgilovchi xususiyati.
Mahsulotning sifatini yaxshilamoq. Ishning sifatini oshirmoq.
Nonning sifati uning namligi va gʻovakligi kabi xossalar bilan belgilanadi. — Gʻ. Mahkamov, Dasturxonimiz fayzi
Fabrikamizda ilgʻorlar juda koʻp, ular ham mahsulot koʻlami uchun, ham sifati uchun kurashadilar. — Gazetadan
4. Qoʻshma soʻz tarkibida “oʻxshash“, -simon kabi maʼnolarni bildiradi, masalan,
devsifat, odamsifat, ulugʻsifat.
5. tlsh. Predmetning belgisini bildiruvchi soʻzlar turkumi.
Nisbiy sifat. Tub sifat. Sifat darajalari.
- Sifatida Vazifasida, oʻrnida, -dek. Bir adib sifatida aytishim mumkinki, bunday fazilatga erishish oson emas. — S. Karomatov, Oltin qumMen telepatiyaga ishonaman. Gʻarbda telepatiya maxsus fan sohasi sifatida oʻrganilayotgan emish — Oʻ. Hoshimov, Qalbingga quloq sol