Qidiruv

ot Sherik boʻlish, sherik (birgalik) holat; sherik holatdagi.

Sheriklik osh qornimni ogʻritadi. — Shuhrat, Jannat qidirganlar

Bir oshnam bilan sheriklikda toʻrt qoʻy boqib yurgan edim. — A. Qahhor, Qoʻshchinor chiroqlari

Nazirboy Yolmonboylar bilan sheriklik paxta zavodidan tashqari mustaqil jin ham soldirgandi. — J. Sharipov, Xorazm

ot 1. Biror ish-harakatni birga bajaruvchi; hamkor.

Ahmadjon sherigi bilan granatalarni chogʻlab, hayot-mamot paytini kutib turishdi. — A. Qahhor, Oltin yulduz

[Qodirqul:] Jim, ahmoq! Boyning bultur kuzak bir qashqa oti yoʻqolgan. Ikki ming soʻm puli saroydan oʻgʻirlangan. Shularni ham sen oʻgʻirlagansan. Gapir, sheriklaring kimlar? Hamza, — Boy ila xizmatchi

Doʻsmatov tuproqni kanal oʻzanidan chekkaga otib berar, sherigi esa nariga itarardi. — Oʻzbekiston qoʻriqlari

2. Oʻzaro birga boʻlgan shaxs, birga holatdagi shaxs (birga turgan, birga yurgan va hokazo).

Ikki kishilik palataga joylashdik. Sherigim betlari qip-qizil, oʻsiq qoshlariga bitta-ikkita oq tushgan bir kishi edi. — N. Aminov, Qaltis hazil

Uzunrogʻi toʻxtadi, sherigi yugurgilab keldi — S. Siyoyev, Yorugʻlik

3. Biror jihatdan, qaysidir jihat bilan oʻzaro birga (birgalikda) boʻlgan ikki shaxs yoki shaxslar; ogʻayni, doʻst va shu kabilar shaxslar.

Ravshan tushlikda shoʻrvaga navbat oldi. Sheriklari tandirdan yangi uzilgan somsani stolga uyib, jam boʻlishib, Ravshanni kutib turishdi. — Yoshlik

Avaz sheriklari bilan daxma eshigidan chetroqda turibdi. — S. Siyoyev, Yorugʻlik

4. Biror narsaga bir xilda talabgor, bir tan boʻlgan shaxs.

Xullas, ikki gruppaga bir xilda xizmat qilganim uchun, unisi gʻolib chiqsa ham, bunisi gʻolib chiqsa ham, mukofotga sherikman. — X. Toʻxtaboyev, Shirin qovunlar mamlakati

Bu yerdan bir qop oltin topib oldim. Sherik boʻlaman desang, chiq! — O. Yoqubov, Izlayman

5. s. t. (faqat 3-shaxs birlik shaklida — sherigi) Bir xil yoki bir juft narsalarning har biri.

Bu tuflining sherigi qani?

Bu qoʻyni olib borib, sherigi bilan yana bir-ikki oy boqing — A. Qahhor, Qoʻshchinor chiroqlari

ot Biror ish-faoliyatda bir-biri bilan sheriklik qilish, sherik boʻlib ish tutish.

U birorta yolgʻiz otlik bilan sherikchilik qilib, adirga don sepib, oʻz qishlogʻida tirikchilik qilish niyatida boʻladi. — P. Tursun, Oʻqituvchi

Sholikorlik bilan koʻpincha sherikchilik asosida ishlaydigan, koʻchib yuruvchi mavsumiy kishilar shugʻullanmoqda. — Gazetadan

fl. Biror ish-harakatni bajarishda boshqa kishi bilan birlashmoq, sherik boʻlmoq; boshqa kishiga qoʻshilmoq, birgalashib harakat qilmoq.

Sheriklashib ishlaganning yuragi sherday boʻlar. — Maqol

[Matqovul] Oʻziga oʻxshash biron yakka ulov bilan sheriklashib, yerga yaxshi ishlov bermoqchi, hosilni ham, albatta, koʻproq olmoqchi edi. — M. Ismoiliy, Fargʻona tong otguncha.