Qidiruv

ot Serbiya va Chernogoriyaning serb-xorvat tilida soʻzlashadigan asosiy aholisi.

Serblar 12-asrda xalq sifatida shakllangan. — OʻzME

sft. Eni keng; enli.

Serbar chit.

Mirzo Ulugʻbek belidagi serbar kamariga osilgan kalitni olib, eshikning qulfini jaranglatib ochdi. — O. Yoqubov, Ulugʻbek xazinasi

U yosh yigitlardek chaqqon, serharakat, sochida bitta ham oqi yoʻq, belida serbar kamar. — E. Aʼzam, Kechikayotgan odam

Ular serbar yoʻlakdan oʻtib borib taxta soʻriga chiqib oʻtirishdi. — Sh. Boʻtayev, Qoʻrgʻonlangan oy

sft. Bargi koʻp, bargi qalin; quyuq, zich bargli.

Qoʻriq va boʻz yerlarda yaratilgan bogʻning nihollari serbarg va sernovda boʻlsa ham, tanalari yosh va ingichka edi. — Sh. Rashidov, Boʻrondan kuchli

sft. Bola-chaqasi koʻp; serfarzand.

Uy bekasi bombadan qulogʻi xiyla kar boʻlgan, yum-yumaloq, sergap, serbola ayol edi. — Oybek, Quyosh qoraymas

Shu serbola, serxona, sergʻavgʻo uyning nimasidir koʻnglimga orom beradi. — A. Muxtor, Chinor

sft. Bezagi, hashami koʻp; serhasham.

Baland, serbezak shiftda, oltin suvi yugurtirilgan kuchli zanjirda kattakon qandili hisobsiz chiroqlari bilan gavharday tovlanib turar edi. — M. Ismoiliy, Bizning roman

sft. 1. Boʻyogʻi koʻp, boʻyoqdor; qalin boʻyoqli.

Serboʻyoq rasm.

2. koʻchma Koʻp boʻyoq berilgan.

Jajji qizcha edim, havaslarga boy, Sirli koʻrinardi serboʻyoq olam. — M. Egamberdiyeva, Gulbarg