Qidiruv

sft. 1. Uncha chuqur boʻlmagan, chuqur emas (daryo, koʻl, ariq va shu kabilar haqida).

Hali yomgʻirlar boshlanmagani uchun, anhor suvi tiniq, lekin toshlari koʻrinib turgan sayoz chekkalari shishaday rangsiz-u, chuqur joylari koʻkimtir-yashil. — P. Qodirov, Uch ildiz

Biz, bir eshelon soldat, bepoyon dashtga tushib, sayozgina daryo boʻyida chodir tutib yotardik. — O. Yoqubov, Izlayman

2. rvsh. Yuzalab, chuqurlashmasdan.

Boshliq, bir kolxoz traktorchisi oʻn uch gektar yerni sayoz haydagani uchun sud uni qayta tekinga haydab berishga hukm chiqarganligini aytib berdi. — J. Abdullaxonov, Toʻfon

Sayoz oqqan daryo shagʻillaydi, deganlaricha bor ekan. — S. Karomatov, Hijron

3. koʻchma Mazmunan siyqa, yuzaki, gʻoʻr.

Xom-xatala asarlarga, gʻoyaviy-badiiy sayoz buyurtmalarga chek qoʻyish vaqti allaqachon keldi. — Gazetadan

[Salimxonning] Ilmi juda sayoz, faqat qaqillab gapirishi bor — Mirmuhsin, Umid

ot 1. Soy, koʻl, ariq, daryo kabi suv havzalarining suvi kamayib, tagi yuzaroq boʻlib qolishi.

Koʻlning sayozligi.

2. Tagi uncha chuqur boʻlmagan, sayoz joy.

Sayozlikning narigi tomonidagi daryo tarmogʻiga tushib koʻrgan edi, chuqur ekan, boʻy bermadi. — J. Sharipov, Xorazm

3. koʻchma Yuzakilik, biror sohada bilim va mahoratning yetarli boʻlmasligi.

Uning original ijodiga tasvirda sayozlik va soxtakorlik qanday yot boʻlsa, tarjimalari ham xuddi shunday tabiiy jaranglaydi. — Gʻ. Salomov, Tarjima nazariyasiga kirish

Oʻqiyman, deb ikki yil institutga bordi, kirolmadi. Bilimi sayozlik qildimi yo omadi chopmadimi — S. Siyoyev, Otliq ayol

fl. 1. Suvi kamayib yoki tosh, shagʻal, balchiq toʻplanishi oqibatida tagi yuzaroq boʻlib qolmoq.

Bahor chogʻlari tezoblikni haddan oshirsa, kuzga yaqin [daryoning] tagi koʻrinar darajada sayozlanib qoladi. — J. Abdullaxonov, Xonadon

2. koʻchma Mazmunan yuzaki boʻlmoq.

Fikringiz sayozlanib qolibdi.

fl. ayn. Sayozlanmoq 1, 2.

Daryoning sayozlashishi.

fl. Sayozlashmoq feʼlining orttirma nisbati.

Мелкая река (пуще) гремит.