фл. 1. Қизил ёки шунга яқин тус олмоқ, қизил тусга кирмоқ.
Осмон қизарди. Қулупнай қизара бошлади. Бети совуқдан қизариб кетди. Нон қизариб пишди.
Жуда чиройли бизнинг боғчамиз, Қизариб қолди гилос, олчамиз. — Қ. Ҳикмат.
Шарқ уфқи қон пуркалгандек қизарди. — С. Анорбоев, Оқсой
2. кўчма Ножўя, номақбул хатти-ҳаракати, қилмиши, айби, камчилиги ва шу кабилар учун кимса олдида хижолат тортмоқ, изза ҳолатга тушмоқ.
Модомики мендан гуноҳ содир бўлмади, текширсалар, ҳақиқат олдида ўзлари қизариб қоладилар, шундай эмасми? — Ойбек, Нур қидириб
Текин томоқ бизларга ёт; Меҳнат билан ширин ҳаёт. Ё эл билан бўлмоқ керак, Ё қизариб ўлмоқ керак. — С. Акбарий