ot 1. Dastaga oʻrnatilgan yassi va uzun tigʻli roʻzgʻor asbobi.
Yoʻqolgan pichoqning sopi oltin. — Maqol
Oʻtmas pichoq qoʻl kesar. — Maqol
Yaxshi gap bilan ilon izidan, yomon gap bilan pichoq qinidan chiqar. — Maqol
Zokir ota qochish yoʻllarini yaxshi uqtirgach, yirtiq koʻn etigining qoʻnjidan bir pichoqni olib, sekin menga uzatdi. Gʻayratiy, — Unutilmas kunlar
Toʻlanboy soʻrida chordana oʻtirib olgan, pichoqni taxtaga taq-taq tegizib, sabzi toʻgʻrayapti. — S. Ahmad, Ufq
2. tex. Turli asboblarning kesuvchi qismi.
Goʻsht qiymalagich pichogʻi.
- Pichoq tortmoq (yoki qoʻymoq) Pichoq bilan kesmoq, soʻymoq. Mabodo hoʻkiz yomonlab qolguday boʻlsa, borib, darrov boʻgʻziga pichoq tortib yuborasan. — Gʻ. Gʻulom, Shum bola
- Pichoq (borib) suyakka yetmoq (yoki taqalmoq) Chidam, bardosh tugamoq. Pichoq borib suyakka yetgandan keyin, nima qilsin bechora xalq — K. Yashin, HamzaHojiona Yoʻq, pichoq borib suyakka taqaldi. — Hamza, Boy ila xizmatchi
- Pichoq uchiday Ozgina, zigʻirday. — Ey oʻrtogʻey, — dedi u, — nimasini soʻzlaysiz, shu zamonning qizlarida pichoq uchiday sharm-u hayo qolmadi. — F. Gʻulom, Tanlangan asarlar
- Pichoqqa ilinmaydi Arzimaydi, arzigulik yeri yoʻq, arziguday emas. Pichoqqa ilinmaydigan hosil.
- Pichogʻi keskir Oʻtkir, gapi birovlarga oʻtadigan kishi. Hojimurod esa pichogʻi keskir raislar qatorida yurardi. U raykom sekretari bilan prokuraturadan boshqa rahbarlarni rahbar qatorida koʻrmasdi. — S. Ahmad, Jimjitlik
- Pichogʻi moy ustida — Ha, Sodiqjon boyvachchaga xudo bergan, — dedi Boʻronboy uchuriq qilib, — hamisha otgan oshigʻi olchi, pichogʻi moy ustida odam u! — K. Yashin, Hamza
- Oʻtmas pichoq bilan soʻymoq Chidab boʻlmas darajada azoblamoq. [Odiljon:] Qayoqdan ham toʻyda oʻsha qiz bilan ashula aytdim, oʻyin tushdim, oʻshandan beri Gulchehra meni oʻtmas pichoq bilan soʻyib yuribdi. — U. Nazarov, Gʻurur.