sft. 1. Ov qilinadigan qush va hayvonlar serob joy.
Tirikchiligini shikordan topadigan har bir ovchi shikor uchun ovloqqa yolgʻiz bir oʻq bilan chiqsin. — Fan va turmush
2. Markazdan uzoq, chet joy; kimsasiz yer.
Ovloqda yashamoq.
Toshkentning shunday biqinida yetti uxlab tushga kirmaydigan ajoyib ovloq joylar borligi hammani hayratga solar edi. — M. Mansurov, Yombi
Joʻralari bilan shu ovloq orolchada oʻtkazgan baxtiyor kunlari yodiga tushdi. — A. Koʻchimov, Halqa
3. Pastqam, xilvat joy, odamdan xoli joy; pastqamlik, xilvat.
Sevargul to onasi ovloq koʻchaning muyulishida koʻzdan pana boʻlguncha qarab turdi. — N. Qilichev, Chigʻiriq
Kimyoxon ikki-uch kun Azizaxonning yoʻlini poyladi, nihoyat, ovloqroq bir joyda uchrashdi ham. — N. Aminov, Qahqaha
Ularni odamlar nigohidan na quyuq bogʻlar, na tun zulmati, na biron ovloq goʻsha yashira oladi. — O. Muxtor, Buxorolik bir yigit
4. rvsh. shv. Kishilardan xoli; tanho.
Oyjamol ovloq oʻtirgan paytda qiziga gap tashlab koʻrdi. — Yodgor
- Ovloqda yurmoq Chetda yurmoq, jamoatdan yoki ishdan oʻzini olib qochmoq. IAkram] Kasaba tashkilotidan ovloqroq yurishga harakat qilardi. — S. Anorboyev, Oqsoy