fl. 1. Vazni, ogʻirligi oshmoq, ogʻirroq boʻlib qolmoq, ogʻir tortmoq; vazminlashmoq; koʻpayib bormoq.
Yogʻoch boʻkib, ancha ogʻirlashdi. Mashinaning yuki ogʻirlashib ketdi.
Qordan kichkina yumaloq yasab, dumalata-dumalata, oʻz boʻylaridan baland katta kurra yasaganlar. U juda ogʻirlashgan. — Oybek, Tanlangan asarlar
2. koʻchma Tobora mashaqqatli boʻlmoq.
Botiralining xayoli uning yelkasiga ogʻir yuk boʻlib tushdi va bu yuk kundan-kun ogʻirlashardi. — Yoshlik
3. Qiyinlashmoq, murakkablashmoq.
Ish ogʻirlashdi.
4. Ogʻir tortmoq, mushkullashmoq.
Bemorning nafas olishi ogʻirlashdi.
5. Moddiy jihatdan nochor holga tushib qolmoq; mashaqqatli, uqubatli boʻlib qolmoq.
Ayam oʻlgandan keyin ahvolimiz yana ogʻirlashdi. — Oybek, Tanlangan asarlar
Zamon ogʻirlashib ketganmish, nima qilay, qon yutib oʻtiribman. — T. Malik, Iblis devori
6. Noqulay, qiyin boʻlib qolmoq.
Endi qizining oldiga kirib, uning betiga qarash unga [qutidorga] juda ham ogʻirlashgan edi, chunki bu fojianing bosh omili deb oʻzini tanigan edi. — A. Qodiriy, Oʻtgan kunlar
7. Xavfli tus olmoq, xavfli, xatarli boʻlib qolmoq, jiddiylashmoq.
Ahvol borgan sari ogʻirlashdi. Pogodin qoʻshinlari yarim halqa ichida qoldi. — I. Rahim, Chin muhabbat
— Boylarning chaqigʻi bilan Yoʻlchining ishi ogʻirlashdi,— dedi Shokir ota. — Oybek, Tanlangan asarlar
8. Kuchaymoq, zoʻraymoq, tuzalishi mahol boʻlib qolmoq.
Bemor kundan-kunga ogʻirlashyapti.
Fazilat opaning ahvoli ogʻirlashib borardi. Rangi sargʻayib, ozib choʻp boʻlib qoldi. — M. Hazratqulov, Jurʼat
9. Oshmoq, kuchaymoq.
Jinoyati ogʻirlashdi. Jazo choralari ogʻirlashdi.
10. koʻchma Gangib qolmoq, oʻzini yomon his etmoq.
Kishi dardini anglatolmasa ogʻirlashadi. — A. Qahhor, Sarob
Qotmadan kelgan Smirnov bu soʻzlarni eshitgach, ogʻirlashib ketganday boʻldi. — Sh. Rashidov, Boʻrondan kuchli
- Boshi (yoki kallasi) Ogʻirlashmoq Boshi gangimoq, gʻovlab ketmoq; oʻzini boshqara olmay qolmoq. Chinni kosa besh-olti bor qoʻldan qoʻlga oʻtgandan keyin, har ikkovining ham boshi xiyla ogʻirlashib, kayf gʻalaba qila boshladi. — H. Gʻulom, MashʼalYelkasining oftobda kuygan joylari achishar, boshi ogʻirlashib, yostiqdan bosh uzolmasdi. — S. Ahmad, Ufq