Поиск

Oʻrtoqlardek, doʻst kabi.

ot 1. Yoshi teng yoki yaqin boʻlib, oʻzaro yaxshi aloqada boʻlgan tengdoshlar (bir-biriga nisbatan); birga oʻsgan; tengdosh, doʻst, oshna.

Ukamning oʻrtogʻi. Qalin oʻrtoq.

Xayr, onajon! Mening uchun buvimni quchoqlab qoʻying, oʻrtoqlarimga salom ayting! — A. Qodiriy, Oʻtgan kunlar

Hatto tumsayib oʻtirgan Asrora ham beixtiyor chapak chalar, oʻrtogʻining husn-u latofatiga mahliyo edi. — S. Ahmad, Ufq

Shu xotinning oʻrtogʻi bor edi. Yaxshi jonon — Oybek, Tanlangan asarlar

Bugun stipendiya olishgani uchun ikki oʻrtoq qoʻlbola osh qilishmoqchi edi. — Oʻ. Hoshimov, Qalbingga quloq sol

2. Dunyoqarashi, faoliyati, yashash sharoiti va shu kabilar jihatidan bir, gʻoyaviy jihatdan yaqin kishi; hamfikr, hamgʻoya.

Qudrat hokimning qon toʻlib ketgan koʻzlaridan yashirinmadi, aksincha, oʻrtoqlari bilan guzarda yarim kechagacha jilmay oʻtirdi. — M. Ismoiliy, Fargʻona tong otguncha

Eski oʻrtoqlaringdan ayrilgansan, yangi oʻrtoq orttirolmading. — A. Qahhor, Qoʻshchinor chiroqlari

3. rasm. Kishilarga murojaatda, odatda ularning familiyasi, kasbi, unvoni va shu kabilar bildiruvchi soʻzga qoʻshib ishlatiladi.

Oʻrtoq direktor. Oʻrtoq mayor.

Qani, oʻrtoq bemor, oyoqlaringizni uzating-chi. — S. Karomatov, Oltin qum

Roʻzimat sahnadan chiqib ketdi-yu, hayal oʻtmay zalda paydo boʻldi va Kanizakning oldiga kelib, qulogʻiga sekin: — Oʻrtoq Ahmedov yoʻqlayotibdilar, — dedi. — A. Qahhor, Qoʻshchinor chiroqlari.

4. s. t. ayn. Turmush oʻrtogʻi; er yoki xotin, rafiq yoki rafiqa.

Halimaxon, oʻrtogʻingiz qayerda ishlaydilar? Erkaklar ham roʻzgʻor ishini yaxshi bilishi, oʻrtogʻiga yaqindan yordam berishi kerak. — Gazetadan

5. Biror ish-faoliyatda birga boʻluvchi, biror narsani baham koʻruvchi; sherik.

Oshga oʻrtoq — boshga toʻqmoq. — Matal

Dam boʻlaman oltin quyosh Husniga oʻrtoq. Dam teraman etak-etak Gullar: pushti, oq. — Gʻayratiy

ot Oʻrtoqchilikka xos munosabat; doʻstlik.

Hojiga teng boʻlmasa, Abulbaraka bilan oʻrtoqligi boʻlmasa Albatta, Tamannoning ilinjida yelib-yuguradi-da! — Shuhrat, Jannat qidirganlar

Bobolarimiz ham, Qoʻrgʻon qurma, boylik toʻplama, doʻst orttir, deganlar. Haqiqatan ham doʻstlikdan goʻzalroq, oʻrtoqlikdan kuchliroq narsa yoʻq olamda. — M. Salom, Kechirim

ot ayn. Oʻrtoqlik.

[ Sunnat] Axir dunyoda oʻrtoqchilik, tanish-bilishlik ham bor. Seningcha, yolgʻiz muhabbat bor-u, boshqa hech narsa yoʻq. — Shuhrat, Shinelli yillar

fl. 1. Oʻrtoq boʻlmoq, oʻrtoqlik munosabatini tutmoq.

Yoʻlchi ular bilan sodda va ochiq koʻngil bilan soʻzlashib, birpasda apoq-chapoq oʻrtoqlashib qoldi. — Oybek, Tanlangan asarlar

Faqat ikkovlaring doʻstlashib, oʻrtoqlashib ketishlaringni xohlardim. — O. Yoqubov, Er boshiga ish tushsa

2. koʻchma Xursandchilik, qaygʻu-hasrat va shu kabilarga sherik qilmoq.

Xadichaxon Ahrorova ham qurultoy minbaridan turib nutq soʻzladi. Vakillar bilan oʻz tajribasini oʻrtoqlashdi. — N. Safarov, Xadicha Ahrorova

U hikoya juda qiziq boʻlganidan hozirgacha esimdan chiqmagan va uni naql qilib, kitobxonlar bilan oʻrtoqlashsam, zarar qilmasa kerak. — S. Ayniy, Esdaliklar

fl. Oʻrtoqlashmoq feʼlining majhul nisbati.