Поиск

ot 1. Kichik yoki ingichka nay.

U yerda ham laboratoriyadagiday egri-bugri shisha naychalar, shisha idishlar, oʻlchagʻichlar, elektrokamera, har xil asboblar. — S. Anorboyev, Oqsoy.

2. maxs. Ip oʻraladigan naysimon asbob yoki mashina qismi.

Bu yerning bola-chaqasi tili chiqib, avval bilgan soʻzi — arqoq bilan tarogʻu naycha bilan moki. — A. Muxtor, Opa-singillar

3. bot. Poliz ekinlarida hosil boʻluvchi tuguncha, nishona.

Shu bilan oshqovoqning tutgan naychalari sargʻayib toʻkilaverdi. — S. Ayniy, Esdaliklar

Shaharliklar juda olifta, nozik kelishadi. Podvalda koʻkartirilgan kartoshka urugʻining naychasidan ham nimjon. — M. Hazratqulov, Jurʼat

ot 1. Uzun, ichi teshik narsa, ingichka truba.

Shisha nay. Qamish nay.

2. Turli narsa, asboblarning shu shakldagi qismi.

Mulla chilimning nayini labiga bir tegizgandan keyin uni Hayit amin tomoniga burib bir jilmaydi. — S. Ayniy, Qullar

3. Oltita teshigini barmoqlar bilan bekitib-ochib, puflab chalinadigan musiqa asbobi; sibizgʻa.

Nabigul keldi. Uning ketidan biri nay, biri tanbur, biri dutor koʻtarganicha yigit kirdi. — A. Qahhor, Qanotsiz chittak

Yoʻlchi chindan ham nay chalishni bilar edi va yaxshi chalar edi. — Oybek, Tanlangan asarlar

fl. Tuguncha hosil qilmoq, tugmoq (qovun, bodring, qovoq kabi poliz ekinlari va boshqalar haqida).

Bodring naychaladi.

Xullas, qattiq mehnatlari zoye ketmadi, qoʻshnilarniki chopiqqa yetganda, Xolboyning paxtasi ikkinchi chopiq soʻrab gʻunchaladi, gullab naychaladi. — K. Yashin, Hamza

fl. Naychalamoq feʼlining majhul nisbati.

Qoʻl bilan stib yoki urib sanchiladigan uchi oʻtkir qurol.MIZRAK

Nay orqali chekish; nay bilan tortib chekiladigan.

Nayaki qilmoq.

Uch yil ichida u [Mamaraim] kirmagan koʻcha qolmadi. Nayakini oʻrgandi, qora dori yedi, takyalarga kirib, koʻknori ichdi. — M. Ismoiliy, Fargʻona t.o

Chapani yigitlar qittak nayaki qilib oldilar-da, xuftondan ogʻdirib, Qaʼniga joʻnadilar. — Oybek, Ulugʻ yoʻl