Қидирув

от 1. Нарсаларнинг умумий белгилари билан бирлашувчи гуруҳи; тур, хил.

Меваларнинг кечпишар навлари.

Мардон Ёʻлчиевич ҳар куни тонг билан тоша чиқиб, ёнғоқ навларини ўрганарди. — Ж. Абдуллахонов, Орият

2. Молнинг, буюмнинг сифат, қиймат жиҳатдан хили, тури; сорти.

Бирон буюмни сифациз ишлаб, аъло навга ҳақ олиш ноинсофлик, виждонсизлик, тўғрироғи, ўғриликнинг бошқа бир тури-ку! — Н. Сафаров, Оловли излар

от 1. Куй, оҳанг; хониш.

Қумрининг тўйи: Безалган уйи, Найнинг навоси Қайта-қайтадан Чалиниб тинмай. — Ғ. Ғулом

Шундан сўнгра сен қадаҳ ушлаб, Хумор кўзла боққил самога, Тингла қушнинг эзгу орзусин, Қулоқ бергин майин навога. — Ҳ. Олимжон

2. кўчма Маълум бир нарсанинг завқи.

Аваз ўрнидан қушдай енгил турди. Оппоқ бўлиб ёришган янги тонг ҳавосидан, безовта кўнглида туғилган янгича бир туйғулар навосидан жон-жаҳони яйради. — С. Сиёев, Аваз

3. (катта ҳарф билан) Шашмақом тизимидаги иккинчи мақом номи

Дуторни созлаш учун реза куйлардангина олиб турган машшоқ, Отабек кутмаган жойда, Наво дан бошлаб юборган эди. — А. Қодирий, Ўтган кунлар

4. кам қўлл. Ғам-алам ифода этувчи аянчли овоз; нола.

Кўзларида нозик бир ўт чақнади. У фахр ўтимиди, ё қаҳр ўти — билиб бўлмади. Лекин мағрур кишининг овози билан эмас, дилгир кишининг навоси билан жавоб қилди. — М. Исмоилий, Фарғона т. о.

от 1. Бирин-кетин содир бўладиган воқеа-ҳодисалар, бажариладиган ишлар тартиби; гал.

Тегирмон навбати билан. — Мақол

Узр Олий Мажлисининг навбатдан ташқари сессиялари.

2. Қаторда ишғол этилган ўрин; гал.

Навбат олмоқ. Навбат кутмоқ. Эрга навбат — шерга навбат. — Мақол

Тўламат мўйлов Нигора томонга кўз қирини ташлаб, Шербекнинг қулоғига шивирлайди: — Энди, укам, Сувоннинг тўйидан кейин навбат сеники. — С. Анорбоев, Оқсой

Равшан тушликда шўрвага навбат олди. Шериклари тандирдан янги узилган сомсани столга уйиб Равшанни кутиб туришди. — Ёшлик

3. Алмашиниб бажариладиган иш; навбатчилик. смена.

Ласточкин баталон штабида постда турарди. Навбати тугагач, ким биландир гаплашиб қолди. — И. Раҳим, Чин муҳаббат

4. Маълум босқич; бажарилган ишнинг маълум қисми, бўлаги.

Урганч бройлер фермасининг биринчи навбатини фойдаланишга топшириш тўғрисидаги ҳужжат имзоланди. — Ёшлик

5. (“бу”“шу”“ҳар”“бир”каби с. бштн) Марта, гал.

Бир навбат.

от 1. тар. Ҳарбий хизматкор, аскар.

Ҳусайинбойқаро Боғи Шимол дарвозаси яқинидаги чодир ичида икки-уч навкари билан ўтирарди. — М. Осим, Сеҳрли сўз

Машина ғув этиб, автомат ушлаган навкарлар ёнидан ўтиб, шаҳарга чиқиб кетди. — Мирмуҳсин, Чодрали аёл.

2. кўчма Хизматкор, ходим.

Раис дала беги эмас, дала навкари. — Ойбек, О. в. шабадалар.

от 1. Шамсия йил ҳисобида янги йилнинг биринчи куни (март ойининг 21-кунига тўғри келади).

2. Баҳор чоғи, баҳор.

Наврўз ёмғири.

3. Наврўз (эркаклар исми).

от 1. Эрта баҳор, илк баҳор, баҳорнинг боши.

Навбаҳор очилди гуллар, Сабза бўлди боғлар. — Муқимий

Ҳар навбаҳор бу кўкаламзорга ҳиротликлар от-аравада чиқиб, бир-икки кун сайр этиб, ҳордиқ чиқариб қайтишарди. — Мирмуҳсин, Меъмор

2. Навбаҳор (хотин-қизлар исми).