Qidiruv

ot 1. Biror ishni bajarish uchun beriladigan yozma yoki ogʻzaki farmoyish yoki buyruq.

Naryad yozib bermoq. Naryadga muvofiq haq toʻlamoq.

2. Biror narsa olish yoki topshirish uchun yozib berilgan hujjat.

Skladdan naryad bilan mol olmoq.

Polvon otam bilan ikkovimiz kolxoz doʻkoniga naryadi yoʻq uch mashina qovun oshirgan emishmiz, tuhmat. — S. Ahmad, Qadrdon dalalar

3. harb. Harbiy xizmatchilar bajaradigan yoki bajarayotgan topshiriq, vazifa.

Naryadda turmoq.

Intizomsiz jangchiga, intizomni buzgani uchun, navbatdan tashqari ikki naryad berish kerak boʻladi. — N. Safarov, Olovli izlar

— Naryaddagilardan boshqalarga dam berilsin, — dedi Yuryev, tepalik garnizonini aylanib chiqqandan keyin. — I. Rahim, Chin muhabbat.

4. harb. Maxsus xizmat vazifalarini bajaruvchi yoki bajarayotgan harbiy xizmatchilar guruhi.

Soqchilar naryadi,

Parovoz tumshugʻiga ikkita pulemyot oʻrnatib, sakkiz kishilik naryad yuborildi. — I. Rahim, Chin muhabbat

ot 1. Artilleriya qurollaridan otiladigan oʻq-dori turi.

Portlovchi snaryad. Yondiruvchi snaryad,

Artilleriya uchun snaryad suv va havodek zarur boʻlgani uchun, Vohidov fursatni boy bermay, snaryadlarni yelkasiga qoʻyib tashiy boshladi. — Gazetadan

Tepada snaryadlar portlar, gilzadan yasalgan zaif ischiroq har larzada pirpirab, qorongʻi yer qaʼridagi hayotni zoʻrgʻa ushlab turgandek tuyular edi. — A. Muxtor, Asarlar

2. Baʼzi texnik qurilmalar nomi.

Yer qazuvchi snaryad.

3. Gimnastika asboblarining umumiy nomi.

Snaryadda mashq qilmoq.

Unda [musobaqada] rossiyalik sportchi T. Lisenko snaryadni 77 metr-u 80 santimetrga uloqtirdi. — Gazetadan