Қидирув

от 1. Ҳайвон ёки ўсимлик маҳсулоти бўлган ёғсимон модда, асосан, юқори ёғ кислоталарнинг мураккаб эфирлари ва юқори молекуляр спиртлардан иборат.

2. Асалари ўзи ишлаб чиқариб, ўзига уя қурадиган сақичсимон юмшоқ модда; ўсимлик ёки ҳайвондан олинадиган шунга ўхшаш моддалар.

Ўсимлик муми. Сунъий мум.

Асаларилар асал, мум, елимдан ташқари, ўз организмида заҳар ҳам ишлаб чиқаради. — Фан ва турмуш

Шариат Ғиёс дўзахиларга ўхшаганлар қўлида ҳар қанақа шаклга кираверадиган юмшоқ мум. — М. Исмоилий, Фарғона тонг отгунча

Мум шамли қандилдай қуруқ лаблари, Бир қатор қиз кетар, елкада обкаш. — Ғ. Ғулом

сфт. 1. Таркибида мум бўлган, муми бор.

Мумли асал.

2. Мум суртилган, мумланган.

Кўзларига уйқу келган шогирд бола мумли ипни қир-қир чўзиб, қатим тортар эди. — Ойбек, Танланган асарлар

от Физиологик функсияларни кучайтирадиган мураккаб биологик табиий маҳсулот; қояларнинг ёриқларидан сизиб чиқадиган смоласимон модда (Шарқ табобатида асосан синган суякларнинг битишини тезлатиш, меъда яраси ва ташқи нерв фалажини даволаш учун тавсия этилади).

Ўшанда Ҳикмат табиб мошдек мумиё бериб, оёқларини тузатди. — Мирмуҳсин, Умид

сфт. 1. Имкони, имконияти бор, бўладиган, амалга ошадиган.

Қани энди ҳаётдаги саноқсиз эҳтимолларнинг барисига жавоб топиш мумкин бўлса. — С. Кароматов, Олтин қум

Ундан ўтиб, дарвоза орқали Дишан қалъага чиқиш мумкин. — С. Сиёев, Ёруғлик

Капсанчилар зиммаларига тушган вазифаларни мумкин қадар тезроқ бажаришга сўз бериб тарқалишди. — А. Қаҳҳор, Қўшчинор чироқлари

2. Рухсат этилган, ижозат қилинган; жоиз.

Боришингиз мумкин. Сўрашингиз мумкин.

— Шаҳарда чўчқа асраш мумкин эмас, — деди Мукаррам. — А. Қаҳҳор, Адабиёт муаллими

— Ўзи бу ерда ичиш мутлақо мумкин эмас, — деди у овозини пастлатиб. — Гулдаста

3. Эҳтимоли бор, эҳтимолдан узоқ, эмас.

[Муҳаррир:] Ёʻлдошева йигирма олтинчи йилда паранжи ёпиниб юрган бўлиши мумкин, буни ҳозир таъна қилишда ҳеч қандай маъно ёʻқ. — А. Қаҳҳор, Бек

сфт. Ўтакетган хасис, бахил, зиқна.

Мумсик одам.

сфт. 1. кт. Бирор фазилати, яхши томони билан бошқалардан ажралиб турадиган, афзалликларга эга бўлган; етук, сара.

Ваъдага вафоли, ахлоқда мумтоз, Дўстпарвар, ўз сўзли, ёрига содиқ. — Ғ. Ғулом

Маҳалладагилар ҳам, мактабдагилар ҳам Комилжонни одобда мумтоз, дейишади. — Муштум

Бу сизнинг куйингиз, устоз Навоий, Ғазал оламида мумтоз Навоий. — А. Исроилов

2. Муайян миллат ва жаҳон фани, санъати, адабиётида муҳим ўрин тутадиган, миллатнинг шон-шуҳрати ва фахри ҳисобланган; классик.

Мумтоз мусиқа. Мумтоз адабиёт.

Шу тарзда Навоий ўзбек мумтоз адабиётида муншаот деб аталадиган янги бир жанрни ҳам бошлаб берди. — П. Қодиров, Тил ва эл

[М. Маматова] Айниқса, мумтоз қўшиқларни ижро этишни жон дилидан яхши кўрарди. — Газетадан

3. Мумтоз (эркаклар исми).