Qidiruv

sft. 1. Bir turdagi kichik boʻlaklardan iborat boʻlgan, yirik emas.

Mayda tosh. Mayda qor. Mayda qum.

Tashlandik tegirmonning chirik novidan suv mayda kumush tomchilarni sachratib, guvullab otiladi. — Oybek, Tanlangan asarlar

Qora qoshlari chimirildi, sadafday mayda tishlari bilan ustki labini chaynadi. — S. Anorboyev, Oqsoy

2. Unchalik katta boʻlmagan; kichik mayda jonivorlar. Mayda bolalar.

Traktorlar gurullab-varillab mayda daraxtlarni tag-tomiri bilan qoʻporib tashlar edi. — A. Qahhor, Qoʻshchinor chiroqlari

3. Mavqeyi, ijtimoiy, iqtisodiy ahamiyati jihatdan katta oʻrin tutmaydigan.

Mayda burjuaziya. Mayda savdogar.

Bunaqangi mayda, xashaki boylarning puli ham mayda boʻladi. — K. Yashin, Hamza

4. Miqdor, son jihatdan kam boʻlgan; bir necha narsa yoki kishidan iborat boʻlgan; kichik.

Mayda otryadlar. Mayda millatlar.

5. koʻchma Ahamiyatsiz, qiymat jihatidan arzimas.

Mayda gaplar. Mayda ishlar.

Orada birmuncha mayda soʻzlar soʻzlangach, kimningdir uf deb yuborgani eshitildi. — A. Qodiriy, Oʻtgan kunlar

6. Tanga-chaqa va umuman yirik boʻlmagan; kichik pul.

Mayda pul. Besh soʻmga maydangiz yoʻqmi?

ot Arzimas, bachkana gaplarni gapirib, gapni chuvalashtirib yuradigan.

Xotin bilan bahslashib, maydagap boʻlgan odam doim yutqizadi. — F. Musajonov, Himmat

ot Maydagap odam.

fl. 1. Kichik-kichik boʻlaklarga boʻlmoq, mayda qilmoq, ushatmoq.

Oʻtin maydalamoq

Qand maydalamoq.

Sherbek boshini koʻtarmay, stol ustidagi gazeta chetini yirtib, maydalab oʻtirardi. — S Anorboyev, Oqsoy

2. Yirik pulni mayda pulga alishtirmoq, ushatmoq.

Yuz soʻmni maydalamoq.

3. s. t. Ichimlik yoki ichkilikni oz-ozdan quymoq, oz-ozdan quyib ichmoq.

Er-xotin choyni maydalab, shu bir-ikki yil ichida boʻlib oʻtgan voqealarni gaplashib oʻtirishdi. — S. Ahmad, Ufq

4. Mayda-mayda yogʻmoq.

Yomgʻir maydalab, ezib yogʻyapti. — I. Rahim, Ixlos

sft. Juda kichik, mayda qismlardan iborat.

fl. Maydalamoq feʼlining majhul nisbati.