Qidiruv

ot 1. Ish, faoliyat, mehnat samarasi, mevasi.

Ijodiy mehnatning mahsuli.

U koʻtarinki kayfiyatda edi, kechagi, bugungi ish mahsulidan xursand. — M. Xayrullayev, Koʻngil

2. ayn. Mahsulot.

Ogʻir sanoat mahsuli.

Paxta bizning gʻalabamizni belgilab beruvchi asosiy mahsulimizdir. — Gazetadan

3. Hosil, unum.

Yer ham tirik jon. Insondek nafas oladi, oziqlanadi, nihoyat, mahsul beradi. — S. Karomatov, Soʻnggi barxan

Dehqon osmonga qarab, yaxshi havodan quvonsa, yerga qarab, moʻl mahsulidan suyunadi. — M. Ismoiliy, Fargʻona tong otguncha.

4. koʻchma Biror narsadan yuzaga kelgan narsa; natija.

Yigitalining rangiga bir oz zahillik uribdi. Bu muttasil davom etib kelayotgan uyqusizlik, adadsiz iztiroblarning mahsuli, albatta. — D. Nuriy, Osmon ustuni

Xulosa shu: ehtiros yoʻq, bu ezmalik, beparvolik mahsuli. — Mushtum

sft. kam qoʻll. ayn. Mahsuldor.

ot Ishlab chiqarilgan narsa; mahsul (lar).

Yalpi mahsulot. Chorvachilik mahsulotlari. Sanoat mahsuloti.

Boʻyoq olish uchun neft chiqindilari va toshkoʻmirni kokslashdan olingan mahsulotlar asosiy xomashyo hisoblanadi. — Fan va turmush

sft. Koʻp, yaxshi mahsul beradigan; sermahsul, serunum.

Mahsuldor yer. Mahsuldor qora mollar.

Oʻzbekistonda yaqin vaqtlargacha asosan paxta yetishtirilardi. Uning yoniga eng mahsuldor ekin — bugʻdoy qoʻshildi. — Gazetadan

ot Mahsul (hosil) berish darajasi, imkoniyati.

Bu sessiyalarda chorvachilikning mahsuldorligini oshirish masalalari muhokama qilingan. — Mushtum

Xoʻjalik mahsuldorligini oshirishning omillari xilma-xildir. — OʻTA

sft. Mahsuli koʻp, koʻp mahsul beradigan.

Sermahsul mol. Sermahsul tarmoq. Sermahsul ijodkor.