Qidiruv

fl. 1. Yuz, koʻz harakatlari yoki turlicha tovush (tovushlar) bilan xursandligini, zavq-shavqini ifodalamoq, kulgi ifodalamoq.

Xoxolab kulmoq. Qahqaha urib kulmoq. Piq etib kulmoq. Hiringlab kulmoq. Muloyim kulmoq. Miyigʻida kulmoq.

Oldin Kamoliddin maxdum, unga ergashib Asad qori hi-hilab kuldi. — M. Ismoiliy, Fargʻona tong otguncha

Avaz, Feruz shaʼniga aytgan bir baytini eslab, murtida kuldi. — S. Siyoyev, Yorugʻlik

Hafiz Mirzamuhamedovichning kulib turgan chehrasi jiddiylashdi. — S. Karomatov, Oltin qum

Hamon kulib turgan koʻzlari bilan uni boshdan-oyoq kuzatib chiqdi. — Oʻ. Hoshimov, Qalbingga quloq sol

2. Kulgi bilan masxaralamoq, mazax qilmoq.

Oyi, siz sezasizmi, boynikida orqamdan kulishadi, gapirishadi, piching, kesatiq-mesatiq man yaqinlashsam, jim boʻlishadi [dedi Gulnor]. — Oybek, Tanlangan asarlar

Qandoq boraman kulmaydimi hamma. — Oʻ. Hoshimov, Qalbingga quloq sol

Kulsa kulaversin, bari bir oʻz fikrimda qolaman. — X. Toʻxtaboyev, Shirin qovunlar mamlakati

Biror narsaning yonib-kuyishidan hosil boʻladigan oqish-qora yoki koʻkish changsimon mineral qoldiq

Toshkoʻmirning kuli, shsh Oʻchoqdagi oʻtni sekin-sekin kul bos- — Oybek, Tanlangan asarlar

Solih chekayotgan sigaretasining kulini qoqar ekan, uzilib qolgan gapini davom ettirdi — O. Moʻminov, Xiyobondagi uch uchrashuv

ot Kichik, koʻrimsiz, bechorahol uy; boshpana.

Kambagʻal dehqonlarning kulbasidan farq qilmaydigan bu uy ana, roʻparada shumshayib turibdi. — H. Gʻulom, Mashʼal

Oydinli qish kechasi shunday goʻzal, shunday ulugʻvorki, hatto xizmatkorlarning xarob kulbasi ham allaqanday bejirim manzara yasaydi. — Oybek, Tanlangan asarlar

ot 1. Xursandlik, vaqtichogʻlik va zavqlanishni ifodalovchi, boʻlinib-boʻlinib chiqadigan tovushlar, ovozlar.

Samimiy kulgi. Zalda kulgi koʻtarildi.

Sidiqjon kimningdir qattiq kulgisidan uygʻonib ketdi. — A. Qahhor, Qoʻshchinor chiroqlari

Qogʻozi koʻchgan devorlar, toza boʻlsa ham, eskirib ketgan darparda, sargʻaygan choygumni koʻrib, qanoat hosil qildi, shekilli, yana koʻzlarida kulgi oʻynadi. — Oʻ. Hoshimov, Qalbingga quloq sol

2. Mazax yoki kalaka qilinadigan narsa; kalaka, mazax ifodasi; masxara.

Bu oʻrinsiz ishdan Oftob oyim achchiqlandi: — Manim holim senga kulgimi, qizim? — A. Qodiriy, Oʻtgan kunlar

Birontasini chaqirsam, keyin, albatta, masxara qilishadi, kulgi, mazax uchun ularga bahona topiladi, deb oʻyladi Gulnor. — Oybek, Tanlangan asarlar

ot Tepa tomoni ingichkalashib chiqqan qalpoq, bosh kiyimi (asosan, qalandar, darveshlar kiyadigan uchli qalpoq).

Doʻkon ogʻzida boshiga kuloh kiygan qalandar hadeb aylanishib, isiriqdonini u yoqdan-bu yoqqa silkitaverdi. — A. Muxtor, Opa-singillar

— Bosh ustiga, — dedi kulohiga oq salla oʻragan vazir taʼzim qilib. — M. Osim, Karvon yoʻllarida

ot Loydan turli sopol idishlar, buyumlar tayyorlaydigan hunarmand.

Boʻzchi belboqqa yolchimas, kulol — moʻndiga. — Maqol

Baʼzan tandir vazifasini kulollar ishlagan eski xumlar ham oʻtashi mumkin. — K. Mahmudov, Oʻzbek tansiq taomlari

Olmacha, anoringga balli,

sada rayhoningga balli, Tangrim, mani shoʻr loydan yasagan kulolingga balli. — Qoʻshiqlar