fl. 1. Koʻrmoq feʼlining birgalik nisbati.
Siz bilan anchadan beri koʻrishganimiz yoʻq. Bolalar kino koʻrishdi.
Bular koʻprikdan oʻtishda ajoyib manzarani koʻrishdi — A. Qahhor, Qoʻshchinor chiroqlari
2. Salom-alik qilishmoq, salomlashmoq.
Isroil, Eminlar ham u bilan boshqatdan quchoqlashib koʻrishdilar. — I. Rahim, Chin muhabbat
— Xush kelibsiz xursandman, — dedi uy egasi ular bilan koʻrishib. — M. Osim, Ibn Sino qissasi
3. Uchrashmoq, yuz koʻrishmoq.
Xayr, ertaga koʻrishamiz. Ular tez-tez koʻrishib turishadi.
— Koʻrishganimizga ancha boʻldi, — bazoʻr javob berdi Yoʻlchi. — Oybek, Tanlangan asarlar
Shu yigitni koʻrsam, bir gʻalati boʻlib ketaman, dermish. Ha, Sora ham, koʻrishganlarida bir oz rangi oʻchardi, deydi. — P. Tursun, Oʻqituvchi
- Yuz koʻrishmoq Bir-birini koʻrmoq, yuzma-yuz boʻlmoq. Eʼzozxon uni oʻz otasi qatori hisoblab, bu yerga koʻchib kelgan kunlaridayoq yuz koʻrishgan edi. — H. Gʻulom, Mashʼal