Qidiruv

fl. 1. Kiyim bilan badanni yoki biror aʼzosini yopmoq; kiyiladigan narsa (kiyim)ni tanaga, tanadagi aʼzoga yopmoq, qoʻymoq, ilmoq.

Koʻshak kiymoq. Doʻppi kiymoq. Etik kiymoq. Palto kiymoq. Niqob kiymoq. Qoʻlqop kiymoq.

Qiz tugunini qoʻltiqlab, hovliga tushdi. Kavushini kiymadi. Yalang oyoq ship-ship yurib ketdi. — Oybek, Tanlangan asarlar

Gʻulomjon apil-tapil kiyimlarini kiydi, oyoqlariga kovushlarini ildi sharpasiz qadamlar bilan darcha oldiga keldi. — M. Ismoiliy, Fargʻona tong otguncha.

2. etn. Hadya kiyimi olmoq.

Sharmsizdir yuzlari, Oshga toʻymas koʻzlari, Toʻyga borib, toʻn kiymoq Hamon fikr-u soʻzlari. — Hamza

3. koʻchma Oʻranmoq, qoplanmoq, burkanmoq (oʻt-oʻlan, gul va shu kabilar bilan).

Bahorning dastlabki kunlari: qishloq yashil libos kiygan. — N. Safarov, Xadicha Ahrorova

Dunyoni gullarning xushboʻy hidi tutadi, gulshan-u bogʻlar qizil sarpo kiyadilar. — Gazetadan

fl. 1. Kiymoq feʼlining oʻzlik nisbati.

Kiyinayotib, stoldagi grafinning tagiga qistirilgan bir parcha qogʻozga koʻzim tushdi. — O. Yoqubov, Bir felyeton qissasi

2. Maʼlum tarzda kiyim kiygan holatli boʻlmoq.

Issiq kiyinmoq. Yupun kiyinmoq. Olifta kiyinmoq.

Har doim yaxshi kiyinib, kekkayibroq yuradigan bu chiroyli, qoratoʻri yigit oʻqituvchi Karimov edi. — P. Tursun, Oʻqituvchi

Biroq bugun odatiga xilof ravishda kiyingan: egnida havorang movut chakmon, oyogʻida ham saxtiyon mahsi — S. Siyoyev, Avaz

Kiyinishidan nozik tabiatligi, baland didligi koʻrinib turardi. — Shuhrat, Shinelli yillar

fl. Kiyinmoq feʼlining birgalik nisbati.

fl. 1. Kiyinmoq feʼlining orttirma nisbati.

Oʻgʻlini kiyintirmoq.

2. Kiyim-bosh, kiyim-kechak bilan taʼminlamoq.

Fuod afandi bir yarim yildan beri uni [Hoji qizni] boqar, ichirar, kiyintirar lekin pul olmas edi. — M. Ismoiliy, Fargʻona tong otguncha

Xudoga shukur, boylarimiz orasida saxovatli odamlar ham bor. Ular faqirlarga zakot beradilar, yalangʻochlarni kiyintiradilar. — Oybek, Tanlangan asarlar

fl. Kiyintirmoq feʼlining majhul nisbati.

ot Qovush shoxli sutemizuvchilar oilasining ohu, bugʻu va hokazolar kabi katta bir guruhining umumiy nomi.

Togʻ choʻqqisida oʻtlab yurgan kiyik sharpani eshitib, bosh irgʻatganday boʻldi. — M. Ismoiliy, Fargʻona tong otguncha.