Қидирув

адв 1. afterward(s), later (on), subsequently

2. then, next

рвш. 1. Шу ёки ўша тобда эмас, маълум вақт ўтгач; сўнг.

Шу китобни кейинроқ ўқийман.

Бойваччанинг кимлигини кейин айтаман. — К. Яшин, Ҳамза

Хўп, ҳозир тақмасанг, чўнтакка сол, уйингга яшир, кейин тақасан. — Ойбек, Танланган асарлар

Қалтис йиқилиб, бирон жойи майиб бўлган киши бунинг оғриғини ўша тобда эмас, кейин билгандек, Сидиқжон бу можаронинг бутун даҳшатини шу кечаси кўрпага кирганидан кейин билади. — А. Қаҳҳор, Қўшчинор чироқлари

2. Аввалгисининг кетидан; сўнг, сўнгра.

Мадаминхўжа дастурхон солди, нон ушатди, кейин каттакон бир гурскеттини келтириб, пичоқ тортган эди, қовун қарс этиб ёрилди. — М. Исмоилий, Фарғона тонг отгунча.

Чарос яна йиғлаб юборди. Кейин кўз ўнги қоронғилашиб, ҳеч нима кўринмай қолди. — Ў. Ҳошимов, Қалбингга қулоқ сол

3. айн. (эгалик ва келишик шакллари билан: кейинига, кейинида) орқа (орқасига, орқасида), кет (кетига, кетида).

Душман юрар мард ўғлоннинг кейинидан. — Ойсулув

Туя, одати бўйича, қудуқдан чеккага қараб юрди, кейинидан жун арқон тортилиб борарди. — К. Яшин, Ҳамза

Ақлирасо болаларим билади: Ўқимаган нари, кейинда қолар. — Фозил Ёʻлдош ўғли

4. крш. с. Бундан ташқари, шунинг билан бирга, шунингдек; яна.

Агар [қовун] яхши бўлса, халқ еб, сизни дуо қилади, мен ўзим емайман. Кейин, ким билади, бир палакдан ҳар хил қовун етишади Уч сўлкавой бераман, хўп денг. — Ойбек, Танланган асарлар

5. кўм. взф. (ч. к. билан) Сўнг, кетидан, тугагач, ўтгач.

Ҳаммадан кейин. Ишдан кейин. Овқатдан кейин. Кун ботгандан кейин.

Ҳаммага зеҳн солиб ўтирган Сафаров Бўтабой акадан кейин ўшанга [Рўзиматга] сўз берди. — А. Қаҳҳор, Қўшчинор чироқлари

Сидиқжон овқатдан кейин қўлига газета олган эди, бир мақолани яримлатмасдан, кўзи сузилди. — А. Қаҳҳор, Қўшчинор чироқлари

6. боғл. взф. (ч. к. билан) Сабаб ёки пайт эргаш гапни бош гапга боғлаш учун хизмат қилади ва сабаб, пайт муносабатини билдиради.

Қўл калта бўлгандан кейин, қаёққа узатасан? — Ойбек, Танланган асарлар

Ёруғ дунёдан умидинг бўлмагандан кейин, дарчанг қийшиқ турди нима бўлди-ю, тўғри турди нима бўлди. Бунақа нарсалар орзу-ҳавасга боғлиқ. — А. Қаҳҳор, Қўшчинор чиршугари

Бу ишлар бир қадар битгандан кейин, Сидиқжон онасини олиб келгани Баҳрободга борди. — А. Қаҳҳор, Қўшчинор чироқлари

адв behind, from behind, the lastest

сфт. 1. Кетма-кетликда олдингидан кейин турувчи, навбатдаги.

Олдинги арава қай ёʻлдан юрса, кейинги арава ҳам шу ёʻлдан юрар. — Мақол

Раъно кейинги мисрани ўқиб, ўйланиб қолди. — А. Қодирий, Меҳробдан чаён

У [Ёʻлчи] кўзлаган жойига тезроқ етишга ошиқиб, ўткинчилардан сўрар эди: — Тўпқайрағочга яқин қолдими? — Ҳали бор. Кўприкдан кейинги гузар. — Ойбек, Танланган асарлар

2. Кет томондаги, орқадаги.

Араванинг кейинги ғилдираги. Отнинг кейинги оёқлари.

Шоҳ [пашша] кейинги оёқлари билан қанотининг устини силади. — А. Қаҳҳор, Башорат

3. Охирги, сўнгги.

Ғуломжон кейинги вақтларда танҳоликка майл боғлаб, муллаваччалар суҳбатидан ўзини тортадиган бўлиб қолди. — М. Исмоилий, Фарғона тонг отгунча

Кейинги янги моделлар ичида ёшларнинг спорт костюми бўлиб, бунга беш қиррали фахрли белги берилди. — Газетадан

4. Яқинда пайдо бўлган, янги.

Тошкентлик машҳур бир бойнинг хасислиги ҳақида кейинги, ҳали ҳеч кимнинг қулоғига чалинмаган латифалар суҳбатга ранг бериб турар эди. — Ойбек, Танланган асарлар

Кейинчалик.

Вақт ўтиб, аста-секин.