Qidiruv

sft. Kelini bor; oʻgʻlini uylantirgan.

Axir oʻgʻil uylantirib, kelinli boʻldingiz, yangi kelinning qoʻlini koʻrsatay ham demaysiz! — A. Qodiriy, Obid ketmon

ot 1. Yangi turmushga chiqqan yoki chiqayotgan qiz.

Yangi kelinlarning uyi odatda bezatilgan boʻladi. — F. Musajonov, Himmat

Zargarov: Menga qarang, uka Kuyov bilan kelin mening oldimda, hozir boradi. Registratsiya qiling, boʻlak gap yoʻq — A. Qahhor, Ogʻriq tishlar

2. Oʻgʻilning xotini (qaynota yoki qaynonaga nisbatan).

[Fotima:] Mana shu Marasulni tuqqanimda, Shu oʻgʻlim katta boʻlsa, xotin olsa, kelinimning hech ishiga aralashmayman, deb niyat qilganman. Xudo niyatimga yetkazdi. — A. Qahhor, Ogʻriq tishlar

Qaynona-kelin bir daqiqa chamasi koʻrishib qoldilar. — A. Qodiriy, Oʻtgan kunlar

3. Ukaning xotini (aka yoki opaga nisbatan).

Ziyodillaning oʻz oilasida shu vaqtgacha sodir boʻlgan koʻngilsiz hodisalarni ham, oʻz kelinining bebosh boʻlib ketganini ham hazm qila olmasligi turgan gap edi. — H. Gʻulom, Mashʼal

4. Oʻzidan yosh boʻlgan qarindosh yoki yaqin kishining xotini va shu xotinga murojaat.

[Ganga] Haydar ota aralashdi: — Kelin rost aytadilar. Menga qarang, kelin, oʻrtogʻingiz menga sizni olib kelishni juda tayinlagan. — A. Qahhor, Asror bobo

ot Kelinga, kelin davriga xos narsa va shu kabilar

Kelinligida juda goʻzal edi.

Bu kelinchak kelinlik davrini surish oʻrniga suv tashidi, hovli supurdi, keli tuydi. — K. Yashin, Hamza

Oftob oyimning: “Nega qirq kokil qilmaysan?“ deb soʻrashiga: Qizingiz endi qizlik davridan oʻtib, kelinlik davriga kirdi deb kuldi [Kumush]. — A. Qodiriy, Oʻtgan kunlar

[Nigoraning] Kelinlik liboslari muzga aylanib, badanini sovitib yuborgandek boʻldi — S. Ahmad, Poyqadam

arabchaزوجة ابني, zawjatibniyruschaмоя невесткаinglizchaMy daughter-in-law

ot 1. Akaning xotini (uka yoki singilga nisbatan).

[Nuri]... tagʻin dadamga, akalarimga gapirmang bu sirni. Kelinoyilarim ham zinhor eshitmasin. — Oybek, Tanlangan asarlar

2. Yoshi oʻzidan katta boʻlgan qarindosh yoki yaqin kishining xotini va shu xotinga murojaatni bildiradi.

Agar shu gaplarga qattiq ishonsanglar, Qumri kelinoyi, men hovlingizda qololmayman [dedi Onaxon]. — A. Muxtor, Opa-singillar

[Unsin] Qaddini koʻtarib, jasur boqdi Sharofatxonga: — Kelinoyi, akam birovning tomini teshib qamalgan emas yo birovning haqini yegan emas. — Oybek, Tanlangan asarlar

ot Kelin 1 soʻzining kichraytirish-erkalash shakli.

Elmurod bilan Aleksey yoʻl chetida, childirmaga mungli qoʻshiqni joʻr qilib, kelinchakni uzatib borayotgan ayollarga qarab turishdi. — P. Tursun, Oʻqituvchi

Bir qarishlikdan dutorni sevaman. Bir qoʻshni kelinchakdan oʻrgangan edim. — Oybek, Tanlangan asarlar