Qidiruv

sft. Keki bor, kek saqlagan.

Shunday, u Anvarga kekli edi. Shuning bilan birga, Anvarga qarshi amalda bir ish qilish kuchidan ham mahrum edi. — A. Qodiriy, Mehrobdan chayon

Lekin bular allaqanday alamzada, kekli, doim talvasada. — A. Muxtor, Chinor

ot Biron narsa taʼsirida koʻngilda boʻlgan, qolgan achchiq-alam, oʻch olish his-tuygʻusi.

Kek saqlamoq.

Bolangizning bir martaba dada deganini eshitsangiz, har qanaqa kek esdan chiqadi. — A. Qahhor, Qoʻshchinor chiroqlari

Salim Gulnorga qarshi singlisida boʻlgan zoʻr kekdan foydalanish kerakmi, yoʻqmi, koʻzini yumib oʻylay boshladi. — Oybek, Tanlangan asarlar

Oʻzim aytgancha, uning koʻngli yumshoq, tezgina shaxtidan tushadi. Unaqa kek saqlashni yaxshi koʻrmaydi. — Oydin, Ikki koʻzi shunda

ot Sut, yogʻ qoʻshib oshirilgan xamirdan koʻpincha mayiz qoʻshib pishirilgan shirinlik (odatda kulcha yoki pirog shaklida boʻladi).

sft. 1. Uzoq yashab katta yoshga yetgan, umrining oxirgi bosqichini yashayotgan; qari.

Keksa odam. Keksa ayol. Keksa chinor.

Quyosh endi tigʻ yoya boshlagan salqin sabohda Qorabuloq qishlogʻidan biri keksa, biri yosh — ikki otliq chiqib kelaverdi. — M. Ismoiliy, Fargʻona tong otguncha.

Ana, keksa qayragʻoch, uning tunuka tom ustiga engashgan azamat shoxi qurib qolibdi. — S. Ahmad, Qadrdon dalalar

2. ot Keksa yoshdagi shaxs; qariya.

Keksalar choyxonasi. Keksalar oʻgiti.

Keksalar boʻlsa, bunday issiq oʻttiz yil burun boʻlganini, oʻshanda ham shahar tovaday qizib, odamlar atrof chorbogʻlarda jon saqlashganini eslashardi. — Mirmuhsin, Umid

Keksalarning aytishicha, bunday paytlarda biron-bir tepalikning ustiga chiqib, jimgina quloq solib yotsangiz, yerning nafasini eshitarmishsiz. — Oʻ. Hoshimov, Qalbingga quloq sol

3. koʻchma Uzoq yillardan beri mavjud, koʻp yillarni koʻrgan; qadimiy, eski.

Keksa bilim dargohlaridan biri.

Har bir xalqning ogʻzaki badiiy ijodiyoti u xalqning tarixi qadar keksadir. — OʻTA

Ey, keksa buloqlar, eski qadrdon, Oʻynoqi umrimday joʻshib oqdingiz. — Gʻayratiy

Shunday yorqin, shunday oydin zamoni ham boʻlarmikin bu jafokash keksa dunyoning?! — M. Ismoiliy, Fargʻona tong otguncha.

ot Kek saqlaydigan, oʻch olish payiga tushgan; adovatchi.

Kekchi odam. Oʻtaketgan kekchi.

Avvalam, men siz oʻylagancha kekchi emasman. Sizda nima aybki, sizdan oʻch olsam. — Shuhrat, Jannat qidirganlar

Ha, gap oʻrtamizda qolsin-u, Sardoroyeni izzat-nafsi zoʻr, kekchiroq odam, deyishadi. — H. Nazir, Koʻkterak shabadasi

ot Oshqozonda toʻplangan havoning ogʻiz orqali shovqin bilan chiqishi.

Majlis ahli kekirik, yoʻtal kelsa ham, kuch bilan oʻzini bosib Choʻqayevga quloq berishdi. — K. Yashin, Hamza

Tili uchida, yeng ichida ish bitiradiganlarning, kekirikka ham pora talab qiladigan nafsi nahanglarning kuni bitdi. — Mushtum