Поиск

ot 1. Taraflar oʻrtasidagi kelishmovchilikni, janjalni sudsiz bartaraf etuvchi, kelishtiruvchi xolis vositachi; arbitr.

Uncha katta boʻlmagan bu qishloqning oʻz kayvonisi-yu buzgʻunchisi, oʻgʻrisi-yu hakami, baxtlisi-yu baxtsizlari bor. — Yoshlik

Ketdilar-ku shum riyolar imonni aldab, Hakam boʻlsin, haqni aytsin biladiganlar. — A. Isroilov

2. ayn. Sudya 1.

Yigitali shu damlarda xuddi hozir ustidan yo hayot, yo mamot hukmi chiqaradigan hakamni kutayotgan mahbusdek, tahlikaga tushib qoldi. — D. Nuriy, Osmon ustuni

3. Sport, shuningdek, sanʼat musobaqasida qatnashganlarning mahoratiga baho beruvchi shaxs; arbitr.

Hakamlar hayʼati.

Uloqni olgan odam davrani uch aylanishi kerak boʻladi. Shundan keyingina uni hakamlar oldiga tashlab, sovrinni olish huquqiga ega boʻladi — K. Yashin, Hamza

Aytaylik, futbol boʻyicha jahon chempionatida manman degan hakamlar ham dunyo koʻz oldida gʻirromlikka yoʻl qoʻyadilar-ku! — Gazetadan

ot 1. Oʻtkir tabib; vrach, doktor.

Qadimgi dunyo hakimlari kishi asabiga muzikaning taʼsirini alohida taʼkidlaganlar. — Gazetadan

Shu kasalga chalinganimda, bir hakimga bordim. U tomirimni ushlab: — Sizniki kosib kasali, dalaga chiqing — dedi. — Oybek, Tanlangan asarlar

2. Donishmand, faylasuf.

— Bir zamonda, — dedi dadam, — Aflotun degan bir hakim oʻtgan ekan. — Oybek, Tanlangan asarlar

Forobiy ulugʻ yunon hakimining juda chigal falsafiy mulohazalari magʻzini chaqib bergan. — M. Osim, Ibn Sino qissasi

3. Hakim (erkaklar ismi).

ot ayn. Zagʻizgʻon.

Hakkalar koʻp, ular daraxtlarning chakalak shoxlari orasida tipirchilab, yaproqlarni uchirib yurishadi. — Sh. Xolmirzayev, Zov ostida olishuv

sft. Qimmatli toshlarni oʻyib, tarashlab, pardoz beruvchi usta.

Xiva yogʻoch, tosh, ganch oʻyib naqsh ishlaydigan naqqoshlari, zargarlari, hakkoklari, gilam toʻquvchilari bilan shuhrat qozongan. — Gazetadan

Farhod boʻshasa, koʻngliga kelsa, bir hakkok tosh bitkichlarning doʻkoni qoshiga borib turadi. — Bahrom va Gulandom

ot 1. Bir oyogʻi yoʻq.

Chap oyogʻingizni kesisharmish. Ikki oyoq bilan sizdan koʻrganim shu boʻlsa, endi hakalak boʻlganda nima qilardingiz. Bir kamim choʻloq boqishmidi! — S. Karomatov, Bir tomchi qon

2. bol. Yerga chizilgan kataklar boʻylab bir oyoqlab sakrab oʻynaladigan bolalar oʻyini.

Hakalak oʻynamoq.

fl. shv. ayn. Hakkalamoq 1.

Qoʻzi bechora uch oyoqlab hakillab, jon-jahdi bilan maʼraydi. — S. Anorboyev, Oqsoy