Qidiruv

ot Biror kimsa yoki narsadan salbiy taʼsir, ziyon-zahmat yetishidan, shunga sabab boʻladigan holatdan qoʻrquv, choʻchish; shu haqdagi oʻy, xayol.

Ishtonsizning hadigi choʻpdan. — Maqol

Militsiyaning mashinasini birov koʻrmadimikin, degan hadikda devordan koʻchaga qaradim. — T. Murod, Ot kishnagan oqshom

Bir kuni Ahmadjon ming hadik bilan qizni kinoga taklif qildi. — F. Nasriddinov, Koʻngil

Sifatsiz mahsulotdan sotuvchi ham hadikda. — Mushtum

Yigitning unsiz boqishi unda hadik uygʻotar, shu bilan birga huzur baxsh etar edi. — J. Abdullaxonov, Oriyat

ot 1. din. Islom dinida Qurʼondan keyingi muqaddas manba, Muhammad paygʻambarning faoliyati va koʻrsatmalari haqida rivoyatlar majmui (Rasululloh sallallohu alayhi vassallamning turli sharoitlarda shariat ahkomlariga oid aytgan soʻzlari ham hadisdir).

Bir qancha moʻtabar kitob, oyat va hadislarni qarab chiqdim. — Gʻayratiy,Dovdirash

U [ Teshaboy] ham, oʻz paygʻambarlarining hadisini buzgan yoki firibgarlik, qilvirliklar bilan oʻz paygʻambarlarini aldagan riyokorlar singari dinidan ham chiqmas, shariat oldida murtad ham boʻlmas edi. — M. Ismoiliy, Fargʻona tong otguncha

Ahmadxoʻja oʻz xatida, Madrasayi oliyada tafsir, hadis, ilmi kimyo kabi turli ilmlar oʻqitilishini yozgan edi. — M. Muhammadjonov, Turmush urinishlari

2. esk. kt. Biror kimsaning aytgan soʻzlari yoki gaplari; rivoyat, hikoya.

Maygun labing hadisi mast etdi gʻoyibona, Kayfiyat oʻldi zohir jomi sharob koʻrmay. — Fazliy.

Senga balki ayon, balki noayon, Bir hayot hadisin aylayin bayon. — A. Oripov, Yillar armoni

sft. Hadik, xavfsirash, qoʻrquv tuygʻularini ifodalovchi.

Ochlikdan madorsizlangan onaning va kepak qatirmadan koʻz olmayotgan yarim yalangʻoch bolalarning hadikli qarashi Maynaning koʻnglini buzib yubordi. — Sh. Toshmatov, Erk qushi

ot Hadiksirash odati kuchli, har narsadan hadiksirayveradigan.

Soyasidan qoʻrqar hadikchi, Ip koʻrinar unga ilondek — A. Muxtor

sft. Hadiksiramasdan, qoʻrqmay.

Siz hadiksiz yuravering. Hadiksiz kishi,

Ravshanxon hech hadiksiz u elga ham kirib boradi. — Ravshan

Bizning satrlar Yov yoʻlin toʻsar, Qatnasin hadiksiz Poʻlat karvonlar. — Gʻ. Gʻulom

fl. Hadik olmoq; xavfsiramoq, choʻchimoq, qoʻrqmoq.

Abdibilol, akasining gapini eshitib qolishlaridan hadiksirab, yon-veriga qaradi. — S. Yunusov, Kutilmagan xazina

Farmonqul aka, nega quyonga oʻxshab oʻz soyangizdan hadiksiraydigan boʻlib qoldingiz? — S. Mahkamov, Shogird

Biror odam uzoq qarab qolsa bormi, hadiksirab, kechalarni uyqusiz oʻtkazardi. — S. Anorboyev, Oqsoy