Поиск

sft. 1. Gʻururlanish hissi kuchli, gʻururi baland.

Gʻururli yigit.

2. Kibr-havoli; takabbur.

Ahmad maxdum aslida kibrli va gʻururli odam. — S. Ayniy, Esdaliklar

ot 1. Insonning oʻz qadr-qimmatini bilish, uni hurmat qilish hissi; izzat-nafs.

Yigitlik gʻururi. Qizlik gʻururi.

Uning insoniy gʻururi, tabiatining nozikligi yordam soʻramoqqa yoʻl qoʻymagan. — Oybek, Navoiy

Ahmad oʻrtogʻiga qoyil qolmadi. Erkak kishida gʻurur degan narsa boʻlishi kerak — F. Musajonov, Himmat

Ziyolilar orasidan bir mard chiqib, oʻz milliy gʻururini himoya etishga harakat qildi. Bu kishi Sebzor dahasining qozisi Muhiddinxoʻja Hakimxoʻja oʻgʻli edi. — Fan va turmush

2. Faxrlanish, mamnunlik tuygʻusi; faxr, iftixor.

Shodligidan terisiga sigʻmaydi, koʻngli gʻurur ila mastona chayqaladi. — S. Siyoyev, Avaz

Sanobar oʻgʻliga gʻurur va mehr bilan jilmayib qarab turar edi. — M. Xayrullayev, Koʻngil

— Qishlogʻimiz tuprogʻining sehri bor, — deydi qariyalar gʻurur bilan. — Yoshlik

3. Faxrlanishga asos boʻladigan narsa, kimsa va shu kabilar.

Paxta — oʻzbek xalqining milliy iftixori va gʻururi.

Murotali sevinch va gʻururi boʻlgan oʻrikning tanish va qadrli novdalariga shodiyona boqib, oʻrnidan turdi. — Sh. Rashidov, Boʻrondan kuchli

Xalqimning qahramoni, gʻururi boʻlding. — U. Ismoilov, Saylanma

4. Kibrlanish tuygʻusi, magʻrurlik, kibr-havo.

Olifta boyvachcha kibr va ahmoqona gʻururi ila kresloda taltayganicha qoldi. — Oybek, Nur qidirib

Gapingning tuzi qursin, qizim! Gʻurur gʻurbatga solar, degan naqlning magʻzini chaqsang-chi. — J. Abdullaxonov, Tong yorishgan sohilda

Kamtarin boʻl, hatto bir qadam Oʻtma gʻurur ostonasidan. — E. Vohidov, Muhabbatnoma

sft. Gʻururi yoʻq.

fl. 1. Mamnunlik, faxr hissini tuymoq; faxrlanmoq.

Bemorlar erining qoʻlidan shifo topganidan benihoya gʻururlanardi. — S. Zunnunova, Koʻk chiroqlar

Vatandoshlarimiz bilan suhbatlashar ekanman, ularning tantiligi, zukkoligidan gʻururlandim. — Yoshlik

Elmurod bu ishga ozmi-koʻpmi oʻz mehnati singganini oʻylab, oʻzidan oʻzi gʻururlandi. — P. Tursun, Oʻqituvchi

2. Magʻrurlik, kibr hissini tuymoq, shunday holatda boʻlmoq; kibrlanmoq.

Ergash dunyoda shunday ajoyib narsaning borligini Xolmuroddan koʻra yaxshiroq bilganidan gʻururlanayotgan koʻrinar edi. — P. Tursun, Oʻqituvchi

Parpixoʻja yogʻchi poyloqchilik, chaqimchilik ishining muvaffaqiyatlaridan gʻururlanib toʻplagan maʼlumotini soʻzlab berarkan, ellikboshi uni toʻxtatdi. — Oybek, Tanlangan asarlar

fl. Gʻururlanmoq feʼlining birgalik nisbati.

fl. Gʻururlanmoq feʼlining orttirma nisbati.