ot 1. Odatda kiyimni iflos qilmaslik uchun uning ustidan kiyiladigan yoki ish paytida belga bogʻlab olinadigan ish kiyimi; peshband.
Boshida mogʻor bosgan eski doʻppi, oldida shakar qopdan tikilgan fartuk. — M. Ismoiliy, Fargʻona tong otguncha
Toʻrdagi stol yonida xat yozib oʻtirgan oq fartukli xushroʻygina qiz daftardan boshini koʻtarib: — Keling, xizmat? — deb soʻradi. — H. Gʻulom, Binafsha atri
2. Uquvchi qizlarning rasmiy maktab kiyimi ustidan kiyiladigan oq yoki qora rangdagi yengil kiyimi.
Havorang shtapel koʻylak ustidan oq fartuk kiygan bir jajji qiz oltinchi V sinfining qoʻshtabaqa eshigi oldida bir oz alanglab turdi. — M. Ismoiliy, Bizning roman
3. s. t. ayn. Etak 2.
Izzatulla oʻrnidan turib, bir fartuk paxta koʻtarib kelayotgan Shoira ismli kotiba qizga peshvoz chiqdi. — N. Aminov, Qahqaha