Қидирув

с. т. Номаълум миқдорни ифодалайди; шунча, шу миқдорда.

Фалонча сўм. Фалонча китоб.

Хўш, фалонча таноб ер сеники, деди. — Ҳ. Шамс, Душман

Шу билан бирга ердан олинадиган ҳосилни фалонча деб чегаралаб ҳам бўлмайди. — Газетадан

1. гум. олм. Нарса, шахс ёки воқеа-ҳодиса, улар ҳақидаги бирор хусусият, белгини аниқ билдирувчи сўзлар ўрнида ишлатилади.

Фалон киши. Фалон нарса. Фалон жой. Фалон сўм. Фалон вақт.

Фалон вақтда келаман деса, тамом, келмасдан қўймасди. — Ў. Умарбеков, Чарос

Фалон ҳовлида бўйи етган қиз бор, деган гапни эшитиб, кўзимиз ўйнар, лекин юзини кўрмасдик. — П. Турсун, Ўқитувчи

2. Бирор хусусият ёки ҳодисанинг, жараённинг миқдоран жуда ортиқлигини, юқори даражада эканлигини билдиради.

Энг ёмони — шаҳарда қовун етишмаётган экан, бир тилими фалон пул эмиш. — Х. Тўхтабоев, Ширин қовунлар мамлакати

— Синиқчига оборишни ўзим ҳам биламан. У фалон пул сўрайди. — С. Сиёев, Ёруғлик

Бозорда муштумдай жўжа фалон пул. — Шуҳрат, Жаннат қидирганлар

3. Одоб-ахлоққа зид, айтиш уят ҳисобланган сўзлар ўрнида қўлланади.

Она билан қизни бир одамнинг фалон қилиши шариат юзасидан тузук эмас. — С. Айний, Қуллар

Кампир, агар шунга тегмасанг — фалон, деб оғзига сўз олди, мени уйидан ҳайдаб чиқарди. — Муштум

от гум. олм. Кимсани аниқ атамасдан, унинг исми ўрнида ишлатиладиган сўз.

Фалончи, ота-онаси бўлмаса ҳам, ўксимай ўсди, дейишади. — Ў. Ҳошимов, Қалбингга қулоқ сол

Ёзганда ҳам, фалончини мақтайман, деган ўйим бўлмаган. Жўнгина қилиб, ўзим ўйлаган нарсаларни ёзганман. М. — М. Дўст, Лолазор