Поиск

sft. 1. Mehr, suyish hissi bilan munosabatda boʻlinadigan; suyukli.

Erka qizcha bilan mehribon otaning oʻrtasiga raxna solish johillik. — F. Musajonov, Himmat

Bulgʻorning erkasi, bolam, yoʻl boʻlsin — Erali va Sherali

Sayr etaylik, kel, birga, erkam, Rozi ketsin bizdan umrbod — Shodlik uchun yaralgan olam. — E. Vohidov, Muhabbatnoma

2. Koʻngliga kelgan ishni qilish uchun ixtiyor berib qoʻyilgan, taltaytirib yuborilgan, tantiq.

Erka tutsa onasi, taltayadi bolasi. — Maqol

Munis tengqurlariga oʻxshamasdi: juda erka edi, serjahl edi. — Oʻ. Umarbekov, Yoz yomgʻiri

Faxriddin erka oʻsgan tantiq bola boʻlgani uchun Niso buvi: — Ha, ishqilib, ikkovining joni omon boʻlsin, — deb qoʻya qolar edi. — A. Qahhor, Boshsiz odam

3. Erkalik, suyumlilik ifodalovchi.

— Yolgʻonchi ekansiz, — dedi u yana erka tovushda. — S. Siyoyev, Yorugʻlik

Gulnor chiroyli va erka tabassum bilan, xoʻp deganday, boshini qimirlatdi. — Oybek, Tanlangan asarlar

4. Erka (erkaklar va xotin-qizlar ismi).

ot 1. ayn. Er 1, 2.

Erkak jinsi.

Doya kelgandan soʻng, ichkari hovli erkak zotidan tozalandi. A — Qodiriy, Oʻtgan kunlar

Bilmadim, xotin tortingani uchun erkak tegishgisi keladimi, erkak tegishadigan boʻlgani uchun xotin tortinadimi? — A. Qahhor, Qoʻshchinor chiroqlari

2. Er jinsidagi hayvon, jonivor.

Erkak mushuk. Erkak qoʻy. Erkak gʻoz.

Xotinim qiz tugʻdi, deb xafa boʻlma, sherning erkak va urgʻochisi baravar. — Yoshlik

ot 1. Erkaga xos xususiyat, xislat.

Erkalatgan sari erkaligi oshadi.

2. Erka odamlarga xos qiliq, ish, xatti-harakat; noz, erkalanish.

Qizcha birdan Bektemir tizzasiga boshini qoʻyib, erkalik, yalinchoqlik bilan dedi: — Non ber. Yegim kelyapti. — Oybek, Quyosh qoraymas

3. Erka boʻlgan vaqt, sharoit.

Ming bora roziman ona yurtimdan, Koʻrdi u erkalik chogʻlarimni ham. — A. Oripov, Yillar armoni

Erkalikda oʻsgan Otabekka bu xoʻrlik turmushdan birinchi zarba edi. — A. Qodiriy, Oʻtgan kunlar

sft. Erkalik qilish xohish-ixtiyorini qozongan, shunday erk-ixtiyorga ega.

Bu er-xotinga tantiq, erkatoy qizlari yayrab-yashnasa bas! — Gazetadan

Qamar rais oldin sekretarning erkatoyi edi. — M. Hazratqulov, Jurʼat

ot Erkaklarga xos narsa, belgi-xususiyat, xatti-harakat va shu kabilar

Qandaydir parivashning olovli jozibasi, husn-malohati uning erkaklik qoniga oʻt tashlab yuborgan edi. — K. Yashin, Hamza

— Xotinlarim, — dedi boy, — menda erkaklikdan biror narsa qolmaganini biladilar, uylanishimdan ular uchun biron zarar yoʻq. — S. Ayniy, Qullar

fl. 1. Mehr bilan silab-siypamoq, suymoq.

— Uxla, uxla, aylanay polvon boladan! — erkalab bolaning boshini siladi Yoʻlchi. — Oybek, Tanlangan asarlar

Uni yolgʻiz dadasigina emas, butun qishloq erkalar, hech kishi unga qattiq gapirmas edi. — S. Ahmad, Ufq

[Otabek) Uxlab ketar ekan, oʻzini goh qonga belanib yotgan holda, goh Kumushni erkalab turgan holda koʻrar edi. — A. Qodiriy, Oʻtgan kunlar

2. Koʻngliga qarab, erka qilib oʻstirmoq; erka, tantiq qilib yubormoq.