ot 1. Chaqirish maqsadida aytilgan soʻz, gaplar.
Gʻafur akaning: — Qochadigan odam yoʻq, kelavering, — degan hazilnamo chaqirigʻi eshitildi. — Shukrullo, Javohirlar sandigʻi
2. Biror xatti-harakatga undash, daʼvat qilish.
Demak, Boburning dunyo lazzatlaridan foydalanish toʻgʻrisidagi nasihat va chaqiriqlari hayotdagi turli-tuman koʻn-gilsiz, baxtsiz voqealardan gʻam chekishning oʻrniga tavsiya etilgan tadbirlardan edi. — OʻTA
Komandirning chaqiriqlari vzvod jangchilarini jasoratga chorlardi. — Nazarmat, Joʻrlar baland sayraydi
3. Xonadonda biror munosabat bilan oʻtkaziladigan mehmondorchilik, ziyofat.
Yaqinda bir tanishim qizining tugʻilgan kuni munosabati bilan mehmon chaqiriq qildi. — M. Ismoiliy, Odamiylik qissasi
4. tar. Shoʻro davrida: partiya, hukumat yoki syezd, qurultoy, majlis va shu kabilar tomonidan eʼlon qilingan murojaat, daʼvat yoki shiorlar.
May chaqiriqlari.
Boʻtaboy soʻzining oxirida chaqiriqqa oʻzining tayyor ekanini bildirdi. — A. Qahhor, Qoʻshchinor chiroqlari
5. Navbatdagi saylovdan keyin hamkorlikda ish olib boruvchi deputatlar tarkibi.
- Quda chaqiriq Sovuqchilik quda chaqiriqdan boshlandi. — Sharq yulduzi
- Chaqiriq qogʻozi Idora, muassasa va shu kabilarning rasmiy taklif qogʻozi; povestka. Qodirbek bilan boʻlgan tungi mojarodan bir haftacha oʻtgandan keyin militsiyadan menga chaqiriq qogʻozi kelib qoldi. — M. Qoriyev, Oydin kechalar