Qidiruv

ot 1. Kitob, asar va shu kabilarning maʼlum tugallikka ega boʻlgan har bir qismi, fasli.

Romanning boblari. Dissertatsiyaning boblari.

Bu jang varaqasini tilga kirita olgan yozuvchiga har bir satr ulkan jangnoma uchun bir bob boʻlaveradi. — N. Safarov, Olovli izlar

Romanning bir necha bobi yozilgandan keyin, oʻzim ham sizga oʻxshab, qahramonimning qilayotgan ishlariga shubhalana boshladim. — U. Normatov, Talant tarbiyasi

Ali Meshkobchi xususida avvalgi boblarda soʻz aytgan edik. — Mirmuhsin, Meʼmor

2. koʻchma Davr, sahifa.

Terim mashinasida qizlarimiz rul olib, gʻalaba kitobida ocha oldi yangi bob. — Zulfiya, Yuragimga yaqin kishilar

3. Har xil yoʻl, usul.

Oʻynashmagin arbob bilan, arbob urar har bob bilan. — Maqol

Dod deganda, eshitmaymiz soʻzini, Har bob bilan oʻyarmiz ikki koʻzini. — Nurali

4. koʻm. vzf. (3-shaxs egalik va oʻrin-payt kelishigi qoʻshimchalari bilan) Sohasida, borasida, masalasida.

/Muhammad] Ilm-u himmat bobida Arastudan soʻngra ustodi soniy boʻlib, Al-Forobiy nomi bilan musharraf edi. — A. Muxtor, Chinor

Ul (boyning) qizi husn bobida yakka-yu yagona edi. — Usmon baxshi Mamat oʻgʻli, Boʻtakoʻz

Sevgi haqidagi fikrlarim ham butunlay oʻzgargan, negaki qizlar bobida ancha omadim yurishgandi. — Yoshlik

ot tar. Bobiylik mazhabidagi kishi.

Boʻlmasa, bobiyman deng-chi, kitoblarim jadid-majid kitoblari deng-chi — A. Qodiriy, Kichik asarlar

Bobiylar ham xudoga ishonurlar. — Mushtum

ot tex. Toʻqimachilikda ip, tola, lenta va shu kabilar oʻraladigan gʻaltak.

ot tar. 1848-1852 yillarda Eronda shiachilik ichida vujudga kelgan, islom dinini taftish qilishga intilgan, ommaviy antifeodal qoʻzgʻolonlarga boshchilik qilgan diniy mazhab.

Yer egalari, shoh zulmiga qarshi qaratilgan yirik xalq qoʻzgʻolonlari bobiylik bayrogʻi ostida koʻtarilgan. — OʻzME

fl. Ovozi boricha baqirib, labi-labiga tegmay gapirmoq.

Zamira to maqsadini tushuntirguncha boʻlmay, kampir bobillay ketdi. — H. Nazir, Bir tup gʻoʻza

ot 1. Otaning yoki onaning otasi (nabiraga nisbatan).

Boboning tol ekkani — oʻziga nom ekkani. Maqol.

Bobom burgut boqish bilan menga qaradilar. — S. Ahmad, Yulduz

Bola bobosini ikki-uch kun koʻrmay ichikib qolgan. — S. Ahmad, Ufq

2. (faqat koʻplik shaklida) Oʻtmishda yashab oʻtgan qarindosh kishilar, ajdodlar.

Agar Bobur mirzo Samarqandni tezroq egallamasalar, bobolardan qolgan saltanat begona sulola ilkiga oʻtib ketgusidur. — P. Qodirov, Yulduzli tunlar

Bobolardan soʻzladim, ammo Bir zot borkim, baridan suyuk. — A. Oripov, Yurtim shamoli

3. Hurmat yuzasidan qariyalar nomiga qoʻshib ishlatiladi.

Murod darrov turib, Hoji bilan soʻrashdi va nazokat bilan unga joy koʻrsatdi: — Keling, Hoji bobo! Koʻrin-maysiz, kelmaysiz? — A. Qahhor, Yillar

Utar boboning otasi Gadoyniyoz bobo ham xon tabibi edi. — S. Siyoyev, Yorugʻlik

Qolaversa, oʻzimizning shoir bobomiz Boborahim Mashrabning haq, haqiqat, adolat haqidagi gʻazallarini kim bilmaydi? — K. Yashin, Hamza

Rais bobo ularning yonginasiga kelib, otdan tushdi, toʻriq yoʻrgʻani oʻz holiga qoʻyib, dasturxon yoniga horgʻin choʻkdi. — N. Fozilov, Diydor

4. Aziz-avliyolar nomiga qoʻshib ishlatiladi.

Shayx Zayniddin bobo. Zangi bobo.

Xizr bobo qoʻlingni baland qilsin. — U. Ismoilov, Saylanma

5. tar. Oʻtmishda Buxoroning katta dahalarini nazorat qiluvchi bosh mirshab unvoni.

6. folk. Oqsoqol, otaxon.

Kambagʻallar Togʻayni bobo koʻtargan edi. U kambagʻallarga bosh boʻlib turgan edi. — Rustamxon

7. Bobo (erkaklar ismi).