Qidiruv

ot 1. Toʻzon yoki qor-yomgʻir aralash esadigan shiddatli shamol.

Buri boʻronda quturar. — Maqol

Hamma yoqni qum boʻroni qopladi. Omon koʻrinmay qoldi. — H. Nazir, Yonar daryo

Qum boʻroni oʻtov kigizlarini, baliqchilarning toʻrlarini osmonda uchirib yurdi. — A. Muxtor, Qoraqalpoq qissasi

Zargarov toʻxtab, pastga tushdi. Atrof zim-ziyo, boʻron quturib koʻz ochirmasdi. — A. Muxtor, Boʻronlarda bordek halovat

2. koʻchma Toʻxtamasdan yogʻ(il)ayotgan narsa.

Toʻplarning oʻq boʻroni avvalgi kuch va gʻazab, qahr bilan samoda hukmron edi. — Oybek, Quyosh qoraymas

3. koʻchma Shiddatli, davomli harakat, oqim; toʻfon.

— Xalqning qudratiga, boʻroniga hech qanday togʻ dosh kelolmas! — dedi-da, Sultonmurod chiqib ketdi. — Oybek, Navoiy

Nahot yovuz boʻron xasdek uchirgay? Qaynar tomirimda otashin qonlar. — Guldasta

Xalq qoʻshiqchilarni qarsak va qiyqiriq boʻroni bilan olqishladi. — Oybek, Oltin vodiydan shabadalar

4. Ichki, ruhiy kechinmalar gʻalayoni, tugʻyoni.

Lekin ichidagi haligi jang boʻroni bir nafas ham tinmadi. — Mushtum

Mana, oʻzingiz koʻrib turibsiz, shunaqa gaplardan keyin oshiq qalbida boʻron koʻtarilmaydimi? — X. Toʻxtaboyev, Shirin qovunlar mamlakati

Qoʻzgʻaling, hey, his-tuygʻular boʻroni, Koʻpdan sizga koʻz tutardim umidvor. — Dilshoda, Umidim

Bu soʻzlar Yoʻlchining yuragida boʻron yasadi, u totli, zavqli hayajon bilan qaltirardi. — Oybek, Tanlangan asarlar

5. koʻchma Xavf-xatar, dahshat.

Tinchlik daraxtini olovlardan, boʻronlardan asrashimiz kerak. — Saodat

U ne-ne daryolarning toʻlqinlarini oʻlim boʻronlari orasida kechib oʻtmadi. — Oybek, Oltin vodiydan shabadalar

Senga na boʻronlar kor qila olur, Seni na yoʻqotib, bor qila olur. — A. Oripov, Yillar armoni

6. Koʻchma Balo, ofat, kulfat.

Nifoq boʻroni xarob etgan Xorazmni osonlikcha zabt etib, behisob oʻljalar olib kelganidan u xursand. — M. Osim, Karvon yoʻllarida

Ana oʻshanda koʻrasan Xorazmda fitna boʻronining boshlanishini. — M. Osim, Karvon yoʻllarida

Xalqlar boshiga zulm boʻronini yogʻdirgan va ofatlar keltirgan sariq vabo — Gitler mashinasi zil ketdi. — N. Safarov, Olovli izlar

7. Boʻron (erkaklar ismi).

ot Haydalgan yerning yuza qismini tekislash, kesaklarni maydalab, qatqaloqni yumshatish va begona oʻtlarni yoʻqotish uchun ishlatiladigan qishloq xoʻjalik quroli; six-mola.

Diskli borona. Tirkama borona. Borona qilmoq.

Pluglar orqasiga tirkalgan boronalar xanjar tishlari bilan kesaklarni chaynab borardi. — Sh. Rashidov, Boʻrondan kuchli

Avvalgi yillar Kenjaboy aka boronani serunum va sifatli qiladigan mola oʻylab chiqargan. — H. Nazir, Koʻkterak shabadasi

sft. 1. Boʻron bilan oʻtgan yoki boʻron boʻlib turgan.

Boʻronli qish tuni.

Kechasi boʻlib oʻtgan boʻronli va momaqaldiroqli jaladan

soʻng havo sokin edi. — Gazetadan

2. koʻchma Keskin, shiddatli kurash, qizgʻin jang va shu kabilar bilan toʻlib-toshgan.

Koʻnglimga bitmas farogʻat berdi onam allasi, Boʻronli yillar jasorat berdi onam allasi. — Yo, Mirzo

3. koʻchma Joʻshqin, tugʻyonli.

Uni yosh va boʻronli qalbi Olib ketdi olis shaharga. — A. Oripov, Ruhim

Yulduzlar misoli kulganda ruhim, Boʻronli hislarga toʻlganda ruhim — A. Oripov, Yillar armoni

ot zool. Nayburunlilar turkumiga mansub, suvda yashashga yaxshi moslashgan dengiz qushlarining bir turi.

U Furqatni boʻronni oldindan koʻra bilgan boʻronqush deb atadi. — Gazetadan

fl. Haydalgan yerni borona bilan yumshatmoq, tekislamoq, molalamoq.

Ertaga boronalab, yengil mola orqasidan traktorda ekaverish kerak. — I. Rahim, Hayot buloqlari

Boronalash bilan bir vaqtda tuproqqa mahalliy oʻgʻit ham solib ketiladi. — Gazetadan