«beboshlik» boʻyicha 12 ta natija: Izohli
ot 1. Erkinlik, shoʻxlik; aqlsizlik; tarbiyasizlik.
Yoshlik — beboshlik. — Maqol
Nurli chehrangizda qoldirgandir iz Bolaligimizning shoʻx beboshligi. — A. Muxtor, Asarlar
Voy oʻlay, shotini olib qoʻyish esimga kelmaganini qarang Hoy qiz, tushing. Bunday beboshlik qilmang. — P. Tursun, Oʻqituvchi
2. Oʻzboshimchalik, qonunsizlik.
Amalda siz aytganday qilinsa, beboshlikka katta yoʻl ochiladi, hammayoq anarxiya boʻlib ketadi. — P. Qodirov, Uch ildiz
sft. 1. Boshi (kallasi) yoʻq; boshi kesilgan, boshsiz.
Bir sevgini aylarkanman fosh, Istamasman, sevgingiz aslo Haykal kabi boʻlishin bebosh. — Sayyor
2. koʻchma Aqlsiz, nodon.
Men bebosh qulingizni maʼzur tuting. — Sharq yulduzi
Dadajon, bebosh oʻgʻlingizni kechiring, nachora, dunyoga sizlarni gʻam-gʻussaga botirgani kelgan ekanman. — K. Yashin, Hamza
3. koʻchma Toʻgʻri maslahatga yurmaydigan; hech kimga quloq solmaydigan; gapga kirmaydigan; quloqsiz; tarbiyasiz.
Necha kundan beri akangni kirib koʻr, deyman, bu bebosh uyalaman, deb hech kirmaydi. — A. Qahhor, Sarob
Azizxon bebosh, yerga ursa koʻkka sapchiydigan, qilish-qilmishidan elga nafi tegmaydigan beboshvoq yigit. — U. Normatov, Talant tarbiyasi
yoshligim ham bebosh oʻtgan. Axir, bebosh yigitga kim ham koʻngil qoʻyardi, — dedi Usmon. — A. Eshonov, Bir ogʻiz soʻz
4. koʻchma Tarbiya-intizomga boʻysunmay quygan; itoatsiz, oʻzboshimcha.
Podshohlarini bekor qilgan Rossiya xalqi juda bebosh boʻlib ketgan, hozir hukumat boshida oʻtirganlarga hech kim itoat qilmaydi. — S. Ayniy, Qullar
Gʻuzor fuqarolariga maʼlum boʻlsinkim, togʻ-u toshlarda qochib yurgan beboshlar kelib, Bek janoblarining oyoqlariga yiqilsalar, afv eturlar. — Sh. Toshmatov, Erk qushi
Hozircha isyon tugʻini koʻtarib kelgan bu beboshlarning gapiga koʻnishdan boshqa iloj yoʻq. — M. Osim, Ibn Sino qissasi
5. koʻchma Yomon yoʻlga kirgan, axloqi buzilgan.
Otasi, qandayin nozanin juvon toʻgʻri kelsa ham, koʻz qirini tashlamasdi. Bu bebosh boʻlib ketdi, tiyadigan kishisi boʻlmadi. — Oydin, Hikoyalar
Shunday bebosh boʻlib ketdi qizginang, Ota-ena farzandini tiymaymi? — Gulnorpari
6. koʻchma Tiyib, toʻxtatib, qaytarib boʻlmaydigan; jilovsiz.
Bebosh shamol. Bebosh daryo. Bebosh toʻlqinlar.
Amudaryo dali — telba daryo, bebosh daryo deyishadi. — Rahim Bekniyoz
Bebosh izgʻirin bu keng dashtda yelib-yuguradi. — H. Shams, Dushman
—Seskanib uygʻonib ketdim. Oʻrnimdan turib oʻtirdim, bebosh xayol meni olib qochdi, — dedi Nafisa. — Gʻayratiy, Uzoqdagi yor
ot 1. Boʻshatib, yechib yuborilgan, boshvoqsiz.
Beboshvoq mol.
Sigir jonivorni yil-oʻn ikki oy beboshvoq qoʻydingmi — tamom, undan qoʻlingni yuvib, qoʻltigʻingga uraver. — Oʻ. Umarbekov, Yurak soʻzlari
Bizning dargohga yaqin joyda ikki yashar chamali bir ola tanacha beboshvoq oʻtlab yurar edi. — Gʻ. Gʻulom, Shum bola
2. koʻchma ayn. Bebosh 3, 4, 5, 6.
Betonchilarimiz orasida bir-ikkita beboshvoq bolalar bor, ular koʻpincha odamlarni ishdan qoʻyib, sandiroqlab yuradi. — Sh. Gʻulomov, Yorqin ufqlar
Azizxon elga nafi tegmaydigan beboshvoq yigit. — U. Normatov, Talant tarbiyasi
Chaqmoqday beboshvoq, toshqinday berahm, Lekin koʻzlaringda bir olam hayo. — Mirtemir
bevoshlik s.t. ayn. Beboshlik.
yoqalash Yoqa boʻgʻishib urishmoq, mushtlashmoq. Bu yer shunday gʻujanak joyki, baʼzan bolalar bir-birlarining goʻshtlarini yegudek yoqalashsalar ham, hech kim bilmaydi.
anarxiya siyos. Jamiyatning tashkilotchi hokimiyatning, hamma uchun majburiy qonun-qoidalarning, odob-axloq meʼyorlarining yoʻqligi bilan xarakterlanuvchi holati; hokimiy
rasvogarchilik Odob-axloq chegarasidan tashqari ish, nojoʻya xatti-harakat; sharmandalik. Nega rasvogarchilik qilding? Boshboshdoqlik, beboshlik. Bunday rasvogarchilikni
boshboshdoqlik Hech qanday tartib-intizom boʻlmagan, har kim oʻz boshiga ish tutadigan bir hol; oʻzboshimchalik, beboshlik; anarxiya. Baʼzan qattiqqoʻllik ham kerak. Usiz
to‘y Yeyish, ichishga boʻlgan talabi qonmoq, qonib yemoq, ichmoq, ovqatga, suvga qonmoq. Yeb toʻymagan, yalab toʻymas Maqol Qoʻl bilan berganga qush toʻymas. Maqol Suq to
taltaymoq, beboshlik qilmoq (bolalar haqida)
