фл. 1. Раҳм-шафқат қилмоқ, раҳмдиллик қилмоқ.
Аямасдан урмоқ. Аямасдан танқид қилмоқ. Ёвни аяган яра ер. — Мақол
Девларни аяманг, ўлдиринг, Заргар. Маликайи айёр.Зулфия опа муғамбир ва алдоқчини ва айниқса айёр одамни ёмон кўради, аямайди. — Саодат
2. Эҳтиёт ҳолда тутмоқ, эҳтиётлик билан муносабатда бўлмоқ.
Аяган кўзга чўп тушар. — Мақол
Баъзи ота-оналар болаларини аяган бўладилар-да, уларни ҳаёт учун яроқсиз, жисмоний заиф қилиб қўяётганларини билмай қоладилар. — С. Зуннунова, Олов
3. Дариғ тутмоқ, ҳайф кўрмоқ; қизғанмоқ.
У мендан ҳеч нарсани аямайди.
Маънавиятни мустаҳкамлашга меҳнат ва маблағни аямоқ ўзини келажакдан маҳрум қилиш демакдир. — Газетадан
[Инсоф-диёнатли одам] қўли калталардан мурувватини аямайди. — Газетадан
Меҳнатингни аямасанг, сув бўлса, ўзинг ҳам, молинг ҳам тўқ. — С. Сиёев, Ёруғлик