Поиск

sft. 1. Sariq bilan koʻk rang oʻrtaligidagi, barg yoki maysa rangiga ega boʻlgan rang.

Yashil bargli oʻsimliklar. Yashil parda. Yashil boʻyoq.

Chap tomonda togʻ etaklari, oʻng tomonda yashil paxtazor, oʻrtada qishloq. — I. Rahim, Chin muhabbat

Boshidagi yashil roʻmoli qorachadan kelgan yuzini boʻgʻibroq qoʻygan boʻlsa ham, oʻziga xoʻp yarashgan — A. Qahhor, Qoʻshchinor chiroqlari

Erkin qushlar daraxtlarning quyuq yashili ichidan jonli naylarini tinlikka qoʻyardi. — Oybek, Navoiy

2. Yashil rangli yosh maysalar va oʻsimliklar bilan qoplangan.

Yashil vodiy. Yashil dala. Yashil qirlar.

Oʻngroqda, yashil tepa ustida qoʻylar, qoʻzilar, echkilar oʻtlab yuribdi. — H. Gʻulom, Mashʼal

ot 1. Yashil holat, yashil rangli holat.

Hovlida jaladan keyingi manzara boshqacha: daraxtlar yashilligi yana ortgan. — H. Nazir, Soʻnmas chaqmoqlar

2. Yashil rang.

Yashillik yugurgan daraxtlarning uchlarida ilk bahor quyoshining oltin shuʼlalari tovlanardi. — S. Zunnunova, Gulxan

fl. Yashil tusga kirmoq, yashil barg, maysa va shu kabilar bilan qoplanmoq.

Sal kun oʻtmay bahor jalalari boshlanadi. Qamishzorlar yashillanadi, qirlarda lolaqizgʻaldoqlar gulxani yonadi. — S. Ahmad, Ufq

Sohildagi qator kulrang jiydalar tagi, ilon izi soʻqmoq ham yashillandi. — Sh. Xolmirzayev, Toʻlqinlar

Hakim suvchining dashtga ekkan makkajoʻxorisi bir qarich boʻlib yashillanadi. — Gazetadan

fl. Yashillanmoq feʼlining orttirma nisbati.