сфт. 1. Қисмларга бўлинмаган; бир бутун ҳолда(ги).
Яхлит муз массаси. Яхлит ойнали деразалар. Яхлит пайкал.
Яхлит картадаги чигитлар бир текисда униб чиққан. — Р. Азизхўжаев, Яшил чайла
Нутқимиз яхлит бир оқимдан иборат бўлмай, балки мазмун билан боғлиқ ҳолда бўлиниб-бўлиниб туради. — УТА
Бир танишим меҳнат отпускасини ҳеч вақт яхлит олмасди. — Шукрулло, Жавоҳирлар сандиғи
2. Ягона бир, бир умумий; ягона.
Халқ хўжалигининг яхлит давлат режаси.
Султон Жўранинг Қалдирғоч эртак-достонида тинчлик барча эл-элатларнинг осойишталиги ва бахтли тақдирини белгиловчи энг асосий омил, деган яхлит ғоя илгари сурилади. — Фан ва турмуш
3. Йирик (катта) қисмдан иборат; йирик.
Муз қатламларига урилиб, яхлит-яхлит муз парчаларини баландга ирғитаётган снаряд ва бомбаларнинг гумбурлаши тобора даҳшатли. — Т. Рустамов, Мангу жасорат
Элчиев ҳам жамғармасидан яхлитини кўтариб, бозор-ўчар тараддудига тушди. — Э. Аъзамов, Жавоб
4. Касрсиз, бутун, йирик.
Яхлит рақамлар.