sft. 1. Qismlarga boʻlinmagan; bir butun holda(gi).
Yaxlit muz massasi. Yaxlit oynali derazalar. Yaxlit paykal.
Yaxlit kartadagi chigitlar bir tekisda unib chiqqan. — R. Azizxoʻjayev, Yashil chayla
Nutqimiz yaxlit bir oqimdan iborat boʻlmay, balki mazmun bilan bogʻliq holda boʻlinib-boʻlinib turadi. — UTA
Bir tanishim mehnat otpuskasini hech vaqt yaxlit olmasdi. — Shukrullo, Javohirlar sandigʻi
2. Yagona bir, bir umumiy; yagona.
Xalq xoʻjaligining yaxlit davlat rejasi.
Sulton Joʻraning Qaldirgʻoch ertak-dostonida tinchlik barcha el-elatlarning osoyishtaligi va baxtli taqdirini belgilovchi eng asosiy omil, degan yaxlit gʻoya ilgari suriladi. — Fan va turmush
3. Yirik (katta) qismdan iborat; yirik.
Muz qatlamlariga urilib, yaxlit-yaxlit muz parchalarini balandga irgʻitayotgan snaryad va bombalarning gumburlashi tobora dahshatli. — T. Rustamov, Mangu jasorat
Elchiyev ham jamgʻarmasidan yaxlitini koʻtarib, bozor-oʻchar taraddudiga tushdi. — E. Aʼzamov, Javob
4. Kasrsiz, butun, yirik.
Yaxlit raqamlar.