Поиск

ot 1. Atmosferaning quyi qatlamlarida yuzaga keladigan mayda suv yoki muz zarralari.

Quyuq tuman. Tonggi tuman.

Havo tuman boʻlganidan oʻrmon koʻzga koʻrinmas edi. — M. Muhamedov, Qahramon izidan

Sal oʻtmay soylikni oqish harir tuman qopladi. — O. Yoqubov, Izlayman

Roʻparada past-baland choʻqqilarini osmonga turtib, koʻkish tuman pardasiga burkangan Chotqol togʻlari. — P. Tursun, Oʻqituvchi

2. koʻchma Tumanga oʻxshash, xira, nimqorongʻi holat.

Bahorning fikri bulut bosgan osmonday qorongʻilashdi-yu, koʻz oldini tuman chulgʻadi. — Sh. Rashidov, Qudratli toʻlqin

sft. 1. Tuman qoplagan, tuman bosgan.

Tumanli kun.

Kecha qorongʻi va tumanli edi. — Oybek, Tanlangan asarlar

Tegirmon yoʻlagi un toʻzoni ichiga koʻmilib, kech kuzning quyuq tumanli havosi manzarasini beradi. — A. Qodiriy, Obid ketmon

2. koʻchma Aniq emas, aniq ifodali boʻlmagan.

Tumanli tasavvur. Tumanli fikr.

Shukurjonning miyasida yana chaqmoq chaq-naganday boʻldi-yu, oʻn yillar davomida diliga ozor berib kelgan tumanli oʻylarning hammasini birdan yoritib yubordi. — O. Yoqubov, Ota izidan

ot 1. Tuman bilan qoplangan holat, qatlam.

Tumanlik orasida bir toʻp chugʻurchuq shovqin solib oʻtdi. — Oʻ. Hoshimov, Bir tomchi shudring

2. Tuman bosgan, qorongʻi joy.

Saidiy shu darvoza va shu zanjirnigina oddiy deb bilib, ichkarini sira koʻz oldiga keltirmas va keltirmoqchi boʻlganda, faqat bir tumanliknigina koʻrar edi. — A. Qahhor, Sarob

3. astr. Yerdan juda uzoqda joylashgan va Somon yoʻliga oʻxshash koʻrinishga ega boʻlgan yulduzlar sistemasi.

Kosmik miqyosda planetar tumanliklarning yashash muddati bir necha oʻn ming yil, xolos. — Fan va turmush

Yana ming yillardan soʻng yoritqich atrofida sayyoraviy tumanlik hosil qiladi. — O. Moʻminov, Xiyobondagi uch uchrashuv

fl. Tuman bilan qoplanmoq; xiralanmoq.

Tumanlangan deraza oynalariga yirik qor parchalari oq kapalakday urilardi. — Oybek, Tanlangan asarlar

fl. 1. Xira boʻla bormoq, xiralanmoq.

Koʻz oldim tumanlashdi.

Oʻylaganim sari oʻylarim tumanlashdi. — Z. Doʻstmatov, Yoqut

2. koʻchma Xiralashmoq, noaniqlashmoq.

Bu ogʻir andishalardan Ahmad Husaynning koʻz oldi tumanlashdi. — Oybek, Nur qidirib

fl. Tumanlashmoq feʼlining orttirma nisbati.