Qidiruv

sft. 1. Quyi, past.

— Xizmat? Oʻtiringlar, — aʼlam tetik, ayyor koʻzlari bilan keluvchilarga razm solib, tubanroqdan joy koʻrsatdi. — Oybek, Ulugʻ yoʻl

Kema tuban oqib boradi, Boʻron uni qirga oladi. — E. Rahim

Qulmurodning bu soʻzlarini eshitgan Shokir qizarib-boʻzarib ketdi va nima deyishini bilmasdan, boshini tuban soldi. — S. Ayniy, Qullar

2. koʻchma Mavqeyi, xislatlari, sifati va shu kabilar jihatidan quyi darajali; past, arzimas.

Tuban odam.

Aqlga kelganda, mulla Sultonquldan ancha pastda, tegirmonchidan esa juda ham tuban turadi. — A. Qodiriy, Obid ketmon

Hayot oqimidan sokin, uning talabidan tuban yashash oʻqituvchini beobroʻ va beqadr qiladi. — R. Usmonov, Odobnoma

3. koʻchma Hayot, axloq talabi nuqtayi nazaridan yomon, yaramas.

U [Fazliddin] yaqinda yana ichib kelib, onasini eng tuban haqoratlar bilan tuproqqa qorib tashladi. — M. Ismoiliy, Odamiylik qissasi

Giyohvandlikning qanday qilmishlarga sabab boʻlishi, fohishabozlikning naqadar jirkanch, tuban ekanligini yashirmay-netmay koʻrsatmoqdamiz. — Gazetadan

Boshqa iloj qolmagach, ona eng tuban va jirkanch bir hunarga tutindi; doʻkondorlarga, mulkdorlarga, badavlat odamlarga yanada ziyoda davlat tilab, xayr-sadaqa soʻray boshladi. — P. Tursun, Oʻqituvchi

ot 1. Past holatga egalik, past ekanlik.

Sodiq qoʻlidagi xanjarini bir-ikki qayta solib koʻrsa ham, tegdirish uchun kesmaning tubanligi xalal berdi, lekin oʻzi tetik edi. — A. Qodiriy, Oʻtgan kunlar

2. koʻchma Tuban shaxsga xos holat-xususiyat; tuban xatti-harakat, razolat.

Ilgʻorlik bilan qoloqlik, samimiylik bilan hasad, oliyjanoblik bilan tubanlik toʻqnashadi. — Shukrullo, Javohirlar sandigʻi

Ayol kishiga qoʻl koʻtarish — ojizlik belgisi, tubanlik — madaniyatsizlik belgisi. — Gazetadan

Quyida aytilgan, zikr qilingan, koʻrsatilgan, quyidagi.

Tubandagi faktlar (raqamlar).

ot ayn. Tubanlik.

ayn. Quyidagicha.

fl. 1. kam qoʻll. Pastlashmoq, pastroq tushmoq.

Bulutlar tubanlashib, daraxt choʻqqilarini qopladi.

2. Koʻchma Pastlashmoq, razillashmoq, tubanlikka, razolatga yuz tutmoq.