Қидирув

от 1. Сувни тўсиш, бўғиш, сув оқимини бошқариш учун хизмат қиладиган, одатда, каттароқ оқимга эга бўлган ариқ, дарё ва сойларга қуриладиган гидротехник қурилма, иншоот.

Тупроқ тўғон. Бош тўғон. Тўғон қурмоқ (солмоқ).

Ваҳобжон баҳор тошқинида сув олиб кетиб, ҳалигача тузатилмаган канал тўғонини тузаттиришга бир ҳафтадан бери овора эди. — С. Аҳмад, Тоғ афсонаси

Днепрдай азим дарё олдида бу нима деган гап, қаҳратон қишда, ўқ ёмғири остида сув кечганлар наҳотки шу кичик сойга тўғон сололмаса? — С. Аҳмад, Қадрдон далалар

2. кўчма кам қўлл. Тўсиқ, ғов, тўғоноқ.

Тўғон бўлмоқ. Тўғри таёқ — балога тўғон. — Мақол

Аъзамнинг ҳамон хотинидан кўнгли тўлмас эди. Унга бахтимнинг тўғони деб қарарди. — Шуҳрат, Жаннат қидирганлар

Бизлар энди илгариги сен айтган гўл, — Чўп-у хасдан ҳадик олиб қолатурган Батрак эмас, бўлолмайсан бизга тўғон. — Ғ, Ғулом

3. Тўғон (эркаклар исми).

от 1. Аравага ортилган юкни маҳкамловчи арқоннинг учига боғланадиган катта ёғоч илгак.

Бу ўтинкашларнинг кўпчиликларида учига тўғоноқ боғланган бир арқон ва бир ўроқдан бошқа асбоблари ёʻқ эди. — С. Айний, Қуллар

2. кўчма Бирор ишга, ҳаракатга тўсиқ, ғов бўлиб, тўсқинлик қилиб турган кимса, нарса.

Тўғоноқ бўлмоқ. Тўғоноқ солмоқ.

Мен акушерка бўлиб бордим-у, лекин бу ишни бажаришга руҳонийлар тўғоноқ бўлишди. — М. Алавия, Севинчларим

— Ўзингни ҳам бригадирликка кўтарган Қодиров эди-ку! Энди сен миннатдор бўлиш ўрнига оёғимга тўғоноқ солмоқдасан, — деди Қодиров. — Ш. Рашидов, Бўрондан кучли

фл. Тўғон билан тўсиб, кўл ҳосил қилмоқ.