Qidiruv

fl. 1. Oxiriga, nihoyasiga yetmoq, tamom boʻlmoq.

Savol-javob tugadi. Majlis tugadi. Chopiq tugadi.

Oʻqish tugarmidi? Oʻla-oʻlguncha oʻqish kerak. — Uygʻun, Navbahor

Oʻzbek oyimning gapi tugamasdan, Kumush yana jomga intildi. — A. Qodiriy, Oʻtgan kunlar

Voy, ish oʻlsin, uy ishi tugaydimi? — S. Zunnunova, Yangi direktor

Safar tugab, qaytish vaqti ham yetib keldi. — N. Orifjonov, Shonli avlod

Bomdod namozi tugagan shekilli, toʻp-toʻp odam kela boshladi. — S. Siyoyev, Yorugʻlik

2. Oʻtib ketmoq, oʻtmoq.

Qish tugadi. Vaqt tugadi.

Oktyabr oyi ham tugadi, oʻrik yaproqlari sovuqda oʻynagan yosh bolaning loʻppi yuziday qizardi. — M. Ismoiliy, Fargʻona tong otguncha

3. Ishlatilib, sarflanib tamom boʻlmoq.

Quduqning suvi tugadi. Ovqat tugadi. Kuch-quvvati tugadi. Davlat tugar, bilim tugamas. — Maqol

Korsondagi qimiz tugab, shoʻrva ham ichildi. — A. Qodiriy, Oʻtgan kunlar

Hash-pash deguncha dasturxondagi burda nonlar tugab, bolalar darvoza tomon chopishdi. — S. Karomatov, Oltin qum

Ahmad choʻntagini titkilab koʻrsa, sigareti tugabdi — F. Musajonov, Himmat

4. Yakun topmoq, tamom boʻlmoq, oʻtmoq (vaqt, muddat, makon va shu kabilar haqida).

Vaq-tim tugadi. Yozgi taʼtil tugadi.

Sumbula tugab, kuz boshlanayotgan edi. — F. Musajonov, Himmat

Birinchi smena tugay deb qolganda, Saodatxon rayondan qaytdi. — S. Zunnunova, Yangi direktor

Sayhonlik tugab, tutash bogʻlar koʻrindi. — S. Siyoyev, Yorugʻlik

Yoʻl tugar-u uyiga kirar Qiz zangori eshikni ochib. — X. Davron

5. Biror natija bilan yakunlanmoq, natijalanmoq.

Xoʻsh, chekish nima bilan tugaydi? — Gazetadan

Iskandarovning birinchi muomalasidanoq Yodgor ish yaxshilik bilan tugamasligiga aqli yetdi. — Oʻ. Hoshimov, Qalbingga quloq sol

Ishning yaxshi boshlanishi uning muvaffaqiyatli tugashidan dalolat beradi. — Gazetadan

6. Barham topmoq, yoʻq boʻlmoq.

Savodsizlik tugadi.

Oldingi arava xarsang yotqizilgan yoʻldan tuproq yoʻlga oʻtib, qaldirash tugagach, aravakash orqasiga — Meʼmorga qarab qoʻydi. — Mirmuhsin, Meʼmor

7. koʻchma Safdan chiqmoq, tamom boʻlmoq, oʻlmoq.

Erimbet koʻkragini changallab turardi: Mana endi Japaq tugadi! Muncha sekin yuradi bu? — A. Muxtor, Qoraqalpoq qissasi

1. Bitgan, chala yeri yoʻq, oxiriga, poyoniga yetkazilgan

Endi bilishimcha, biz oʻsha davrlarda oʻynagan narsalarimiz hali tugal boʻlmagan, ancha gʻoʻr asarlar edi — H. Nosirova, Men oʻzbek qiziman

Elmurod birinchi kuni besh vaqt namozni tugal oʻqidi. Ikkinchi kuni uchtasini oʻqib, ikkitasini qazo qildi — P. Tursun, Oʻqituvchi

Ona, tugal yozishdan qalamim ojiz — Gʻayratiy

2. Toʻla-toʻkis, bekam-koʻst; toʻliq, but

Tugal fikr. Tugal jumla

Ikki pud bugʻdoy bilan besh pud sholi berib qutulmoqchi boʻlibdi. Janish boʻlsa, tugal berasan, deb turib olibdi — H. Shame, Dushman

Domlangizni shundoq katta professor qilib, obroʻ, uy-joylarimiz tugal boʻlganda, shularni tashlab ketib qolamanmi, deb qoʻrqaman — Mirmuhsin, Umid

ot Oʻsimlik ildizpoyasining yer ostidagi yoʻgʻonlashgan qismi; ildizmevali oʻsimliklarning hosili, tugunak.

Kartoshka, aslida, oʻsimlik yer osti novdasining oʻsib, kattalashgan tuganagidir. — Fan va turmush

Roʻyanning tuganaklarida hosil boʻlgan kislota toshni eritish qobiliyatiga ega. — Gazetadan

ot Tugal holatdalik, tugal holatga egalik.

Fikrning tugalligi. Asarning tugalligi.

Oʻzbek musiqasida koʻp janr va shakllar mavjud. Xususan, musiqiy dostonlar — maqomlar oʻziga xosligi bilan ajralib turadi. Maqomlardagi mukammallik, tugallikni aytmaysizmi! — H. Nosirova, Men oʻzbek qiziman

fl. ayn. Tugamoq.

Daraxtlardagi sariq barglar toʻkilib tugalgan, yer yuzi oʻzining qishki sariq kiyimini kiygan edi. — A. Qodiriy, Oʻtgan kunlar

Vaqtsiz tugaldi bebaho umring. — Gʻayratiy

sft. Sira ham tugamaydigan, bitmas-tuganmas.

Tuganmas boylik.

Oʻy-lab tursam, suv aslo tuganmas kuch ekan. — Oybek, Oltin vodiydan shabadalar

Dunyoda tuganmas, oʻzgarmas narsa yoʻq. — M. Ismoiliy, Fargʻona tong otguncha

Jahonga taralgan shuhrati tuganmas gʻayrat va shijoatlarining sir-asrori nimada ekan? — N. Safarov, Olovli izlar