Қидирув

от 1. Юзи ёйиқ, бир оз ялпоқ, коса шаклидаги чуқурроқ идиш (турли ўлчамда сопол, чинни, металл, баъзан мармардан тайёрланади).

Сопол товоқ. Чинни товоқ. Тунука товоқ.

Комил товоқларда қаймоқ, ликопларда узум кўтариб кирди. — Ҳ. Ғулом, Машъал

Буви, юзини сузиб турган сутли товоқни ерга қўйиб, нима деяпсан? дегандай Муродга қарадилар. — А. Мираҳмедов, Кулган чечаклар

2. шв. Лаган.

[Ваҳоб] Бир товоқ хушбўй паловни келтириб, олдимизга қўйди. — М. Муҳамедов, Қаҳрамон изидан

3. с. т. Пластинка (патефон, радиола пластинкаси).

Эрталаб ҳосилотнинг хотини патефон товоғини сўраб чиқибди. — С. Аҳмад, Қадрдон далалар

от кам қўлл. айн. Ҳамтовоқ.

— Биз — деди отам, — ишнинг боришидан оқибати нима бўлишини сездик: агар товоқ-дошларимизга қарасак, ўшанча турли-туман лаззатли таомлар олдидан оч қорин билан шаҳарга қайтишимизни билдик. — С. Айний, Эсдаликлар

от Овқат тайёрлаш, ейиш-ичиш учун керакли уй-рўзғор буюмлари.

Тўхта хола ҳовлида идиш-товоқ ювиб юрган экан, Олимжонни кўриб, юраги ёрилиб кетгудек бўлди. — И. Раҳим, Чин муҳаббат

от 1. Овқат пишириш ва ейиш учун ишлатиладиган идиш-оёқ.

Тракторлар қирга энди кўтарила бошлаганда, орқадан қозон-товоқ ортилган ЗИЛ [юк машинаси] етиб келди. — О. Ёқубов, Баҳор кунларидан бирида

2. кўчма Уй-рўзғор ишлари.

Агроном ерини ҳайдаб, пахтасини теравермайдими? Қозон-товоққа аралашиб нима қилади! — Н. Сафаров, Ҳаёт мактаби

Бизда ўз оиласига, бола-чақасига, қозон-товоғига ёпишиб олган хотинлар бор. — А. Мухтор, Опа-сингиллар