ot 1. 1 Oyoq bilan berilgan zarb.
Xudoyqul bir nafas gʻingshib yotdi. Tepkidan ogʻrigan joylarini sekin-asta siladi. — P. Tursun, Oʻqituvchi
Bola koʻrsatilgan ikkinchi soʻzni oʻqiyman deb turganda, sinf eshigi qattiq tepkidan lang ochilib, ichkariga sovuq yopirilib kirdi. — M. Ismoiliy, Fargʻona tong otguncha
2. Toʻp, zambarak kabi otish qurollaridan oʻq uzilganda, uning orqaga beradigan zarbi.
Toʻpning tepkini kamaytiradigan qurilmasi.
3. Oʻq otadigan qurollarning otish mexanizmini ishga soluvchi qismi.
Pulemyot tepkisi. Toʻpponcha tepkisi.
Otaymi, otmaymi! Oʻng qoʻlining barmogʻini miltiq tepkisiga yuborib, uni bosayotgan joyda yana toʻxtadi. — I. Rahim, Chin muhabbat
4. Mahalliy toʻqish dastgohining oyoqlar bilan galma-gal bosib, dastgohni ishga tushirish, uning muntazam ishlashini taʼminlash uchun xizmat qiladigan qismi.
Hojiyaxon boʻz toʻqishni endi oʻrgangan, oʻng qoʻli tasma gʻaltakni tortsa, chap oyogʻi tepkini bosolmas, oʻng oyogʻi tepkini bossa, chap qoʻli gulani juftlolmas edi. — A. Muxtor, Opa-singillar
5. Dastgohning shu qismini bosganda toʻqilib, zichlangan moki ipi.
Atlasning tepkisi qancha koʻp boʻlsa, abr bezakdan olinadigan taassurot shunchalik zoʻr boʻladi. — Gazetadan
- Ot tepkisini ot koʻtaradi Teng kuchlilar bir-biriga bas kela oladi, chidash bera oladi, degan maʼnoli maqol.
- Tepki yemoq 1. Tepki zarbiga uchramoq, tepilmoq. Mamarayim, egasidan tepki yegan itday, orqaga chekindi. — M. Ismoiliy, Fargʻona tong otguncha[Yoʻlchi:] Chiday olmadim, mulla aka Men ham odam farzandi, tokaygacha tepki yeyman. — Oybek, Tanlangan asarlar
- Sakkiz tepki atlas Qalin, yuqori sifatli atlas. Yana yurib ketadi sakkiz tepki gul atlas, Chiviq beqasamlarning olagʻovur bozori. — Gʻ, Gʻulom
- Tepki mashina Maxsus tepkisi, pedalini oyoq bilan bosib yurgiziladigan tikuv mashinasi. Oyim tepki mashinada Donoga koʻylak tikib oʻtirgan ekan. — X. Toʻxtaboyev, Sariq devni minib