Qidiruv

ot 1. Rassom tomonidan chizilgan tasvir, rasm.

Surat solmoq.

Tungi bogʻlar suratga oʻxshar, Har bir chiziq aniq va qora. Kunduzi u men kabi yashar, Tunda — qotib qolgan xotira. — X. Davron, Bolalikning ovozi

Shoirlar surati turibdi qator, Mana bu — Lermontov, mana bu — Furqat. — A. Oripov, Yillar armoni

2. Bosma tasvir, kitob, jurnal va shu kabilarda bosilgan rasm, illyustratsiya.

Suratlar bilan bezatilgan kitob.

Abdurasul oʻqishni bilmasa ham, kitoblarni ishtiyoq bilan varaqlay boshladi va baʼzi bir suratlarga tikildi. — P. Tursun, Oʻqituvchi

3. Fotografik tasvir, fotorasm.

Surat oldirmoq. Suratga olmoq. Suratga tushmoq.

Jamolzoda Gulginaga qarab turdi-da, ichki zavq ila Botirga dedi: — Qara, Botir, Gulginaxonim ohu ila soʻzlashyapti Taassufki, fotoapparatimiz yoʻq, suratga olsak boʻlardi. — Yoshlik

Yonayotgan bagʻrini qanday qilib sovitsa ekan?! Hech sovitib boʻlmaydi! Devordan Hafizaning suratini olib, burdalasinmi? — Mirmuhsin, Umid

4. Tashqi qiyofa, koʻrinish; siymo.

Uyqusiz kechalarda Surating koʻz oldimda. — Mirtemir, Asarlar

Muqbil bir qalandar suratiga kirib, safarga chiqibdi. — Ertaklar

5. (oʻrin-payt kelishigi shaklida) Qoʻshma ravish tarkibida keladi.

Shoshilinch suratda. Rasmiy suratda. Muntazam suratda.

6. mat. Oddiy kasrda chiziq ustidagi son.

Surat va maxraj.

sft. 1. Surati, suratlari boʻlgan; suratlar bilan bezatilgan.

Suratli jurnal.

Men suratli kitobni yaxshi koʻraman. — Mirmuhsin, Umid

2. poet. Biror koʻrinishga ega boʻlgan, koʻrinishidagi, qiyofasidagi.

Qarasa, Yusuf talʼatli, Iskandar savlatli, Rustam jasadli, ajab suratli bir yigit yonboshlab yotibdi. — Malikayi ayyor

Maloyik suratli, gul yuzli dilbar, Rostin degin, dilbar, qaydin boʻlasan? — Malikayi ayyor

ot 1. ayn. 1 rassom.

Suratchi chizgan portret.

2. ayn. Fotograf.

Bizning suratchimiz yana surat oldi. Xotin bundan juda xursand boʻldi. — H. Olimjon, Tanlagan asarlar

ot 1. s. t. Surat chizuvchi, surat soluvchi; rassom.

Suratkash chizgan manzara.

2. ayn. Fotograf.

Novcha suratkash chigirtkaday dam u yoqqa, dam bu yoqqa sakraganicha, tinmay fotoapparatini chiqillatardi. — Yoshlik

Eshik ogʻzida roʻyxatga olayotgan qizlarga yuzlandik. Hisobdan oʻtib, endi zalga qarab yurgan ham edikki, naq peshonamizda suratkashlarning chirogʻi ikki marta yarq etdi. M. M. — Doʻst, Lolazor

ot 1. 1 Foto-surat olinadigan ishxona, fotografiya.

2. Rasmlar muzeyi, galereyasi.

ot ayn. Suratkashlik.