fl. 1. q. x. Shamolda shopirib tozalamoq, shopirmoq.
Oʻt ishi — qovurmoq, Yel ishi — sovurmoq. — Maqol
[Bobodehqon] Kun qizib turgan paytlarda, boshidan oftob oʻtishiga qaramay, yanchiq yanchibdi. Kechki shamolda bugʻdoy sovuribdi. — S. Anorboyev, Bobodehqon soʻzi
2. koʻchma Behudaga ketkizmoq, behuda sarf, xarajat qilmoq.
Pulni sovurmoq.
Men uchun ham, oʻzi uchun ham pulni ayamay sovurar va hech qachon mening moyanam bilan qiziqmasdi. — Yoshlik
3. Mahv etmoq, yoʻq qilmoq, behudaga chiqarmoq.
Tilaklarimni sovurganing yetmay, tilaklarimni yiqqaning nimasi. — M. Ismoiliy, Fargʻona tong otguncha
Shoirning yuragida haqiqat dushmanlariga qarshi, hammadan sevgani — hayot gulini sovurmoqchi boʻlgan yovuz kuchlarga qarshi gʻazab yonar edi. — Oybek, Navoiy
- Kulini koʻkka sovurmoq Batamom yoʻq qilmoq, mahv etmoq, agʻdarib tashlamoq. Chingiz farmoni bilan shaharga oʻt qoʻyilib, kuli koʻkka sovurildi. — Mirmuhsin, Temur Malik
- Koʻkka (yoki behudaga) sovurmoq Shamol quturar, qorni oppoq toʻzonga aylantirib, koʻkka sovurar edi. — Oybek, Oltin vodiydan shabadalar— Bizni davlat pulini koʻkka sovuruvchi tentaklar, xayolparastlar, deb atashayotganlar ham yoʻq emas, — dedi Doniyorov Mohidilga. — J. Abdullaxonov, Toʻfon