Поиск

ot Osuda yerlarda, oromgoh, sayrgohlarda aylanib yurish, tomosha qilish, orom olish.

Bogʻ sayri. Gul sayri.

Qolmay shaharda toqatim, Qishloq chiqardim odatim. Xohi yayov, boʻlsin otim, Goh sayr ham darkor ekan. — Muqimiy

Har navbahor bu koʻkalamzorga hirotliklar ot-aravada chiqib, bir-ikki kun sayr etib, hordiq chiqarib qaytishardi. — Mirmuhsin, Meʼmor

Chaman bulbullaridek sayr etib gulzor-u bogʻlarda, Hamisha yayrab erkinlikda parvoz etgali keldik. — Habibiy, Devon

Qilmadim bir bor oʻshal gul yuzli zebo birla sayr, Qonmagay dil, aylasam ming bitta Laylo birla sayr. — E. Vohidov

ot folk. Sayrlar, sayr-tomoshalar.

Koʻhi Qofni sayron, Devlarni hayron qilgan, Toʻxtamish Qora devning Makonin vayron qilgan Goʻroʻgʻli qattoli shudir, Odamxoʻr battoli shudir. — Ergash Jumanbulbul oʻgʻli, Xushkeldi

Qush solib ovlagin oydin koʻllarni, Sayron qilgin tar ochilgan gullarni. — Ravshan

ot Sayr qilib yuruvchi, sayrda yurgan kishi.

Sayrchilarning deyarli hammasi sara xalq. — Oybek, Navoiy

ot 1. Sayr qilib aylanib yurish, hordiq chiqarish uchun belgilangan joy.

Shahrimizda sayrgohlar koʻpaymoqda.

Maydonning kunbotar tarafida oʻrdani oʻrab olgan sayrgoh bogʻ bor. — K. Yashin, Hamza

Kunning issigʻida kanizlar terlab, koʻhna sayrgohga yetdi. — Nurali

2. ayn. Sayilgoh.

Terim manzarasi ajoyib bir sayrgohni eslatadi. — Tuygʻun, Asarlar

sft. 1. Davomli, yoqimli va koʻp sayraydigan.

Sayroqi qushlar. Sayroqi bedana. Sayroqi chigirtka.

Sayroqi qushlar makoni, sarin yellar ardoqlisi boʻlgan bogʻlar endi xunuk manzara kasb etgan edi. — R. Umarov, Doʻrmon bogʻlari

2. koʻchma salb. Koʻp gapiradigan; vaysaqi, sergap.

Sayroqi xotin.

fl. 1. Yoqimli ohangdor ovoz chiqarmoq, xonish qilmoq (qushlar haqida).

Atrofiga ekkan toza shamshod gul, Har shoxida sayrab oʻtirar bulbul. — Ravshan

Tolda chumchuq sayraydi, Tol bargini chaynaydi, Tol bargi achchiq ekan, Yurakka sanchiq ekan. — Xalq durdonalari

Hovlidagi yongʻoqning tepa shoxiga qoʻnib olgan zargʻaldoq biyov-biyov deb sayrardi. — M. Mansurov, Yombi

2. koʻchma Yoqimli, shirali ovozda qoʻshiq aytmoq.

Sozandalar joʻrida xushovoz xonanda bulbuldek sayrardi.

3. Yoqimli, jarangdor ovoz chiqarmoq (musiqa asbobi haqida).

Dutorimning torlari qoʻsh bulbuldek sayraydi. — Qoʻshiqlar

4. koʻchma salb. Tinmay gapirmoq, vaysamoq, javramoq.

Joʻralari orasida shirin suxanlik bilan tanilgan Olimxon sayrayverdi. — Oybek, Tanlangan asarlar

— Juda sayrab yubordingiz, bekam! — dedi iljayib Zavrak, — sizni bir qadrdon singlim deb hurmat qilib gapirmoqchi boʻlgan edim. — Mirmuhsin, Meʼmor

5. koʻchma Tez, shiddat bilan ovoz chiqarmoq (pulemyot, minomyot, avtomat va shu kabilar haqida)

Bir zumda pulemyotlar sayrab ketdi. — J. Sharipov, Xorazm

6. koʻchma Koʻzni quvontirmoq.

U [qizim] tikkan mahsilarni qoʻlingga ol-u, tomosha qil — sayraydi-da. — Oybek, Tanlangan asarlar