Поиск

ot 1. Qat-qat narsalarning har bir qati, qatlami va ularning orasi.

U doʻppini taxlab, koʻrpaning qavatiga qoʻydi.

Qavat-qavat marmarni koʻrganmisan? Goʻshti oʻshanday bir qavat yogʻ, bir qavat goʻsht boʻladi. — S. Anorboyev, Oqsoy

Sakkiz qavat koʻrpada oyogʻini uzatib yotgan keksalarning bel bogʻlab, dalaga chiqishi boshqalarga oʻrnak. — I. Rahim, Chin muhabbat

Axir u [Mayna] ignaning teshigidan yetti qavat osmonni koʻradigan mergan. El-u yurt orasida uning taʼrifi zoʻr. — Sh. Toshmatov, Erk qushi

2. Xonalari ustma-ust solingan binolarning bir balandlikdagi xonalardan iborat qismi, qatori.

Binoning beshinchi qavati. Ostki qavatda yashamoq.

Bashirjon qavat navbatchisidan kalitni olib, oʻz nomeriga kirdi. — N. Aminov, Qahqaha

3. Ustma-ust joylashgan tokcha, polka va shu kabilarning har bir pogʻonasi.

Munisxon javonlardan birini ochib, uning yuqorigi qavatidan bir toʻp surat oldi. — A. Qahhor, Sarob

4. s. t. Yon, qator, saf.

Otamiz bizni qavatlariga olib, dehqonchilik qildilar. — N. Safarov, Olovli izlar

Mana, yigitlardan soʻra, dashtda dengiz yaratayotganlar shular. Oʻgʻling ham shular qavatida. — H. Nazir, Suv gadosi — oqpadar

Oʻn uchga kirgan akam Solijon onam qavatlariga kirib qoldi. — Gazetadan

5. Ip va shu kabilarga tizilgan narsalarning har bir tizimi; shoda.

Marjon shodasining uch-toʻrt qavati uzilib ketgan, oʻsha uzuq shodalardan marvarid donalari xuddi koʻz yoshiday yerga tomib turardi. — K. Yashin, Hamza

6. kam qoʻll. Marta, karra.

[Xolisxon:] Hammasi esimdan chiqib, ming qavat tagʻin gʻayratlandim. — Hamza, Paranji sirlari

7. Sidra.

Shohim bir-ikki qavat eski koʻylak-ishtondan boshqa narsasi boʻlmagan boʻgʻchani ustiga kerosin toʻkib yondirmoqda edi. — S. Ayniy, Qullar

fl. 1. Qavat-qavat qilib termoq, taxlamoq yoki bukmoq.

Koʻrpani qavatlamoq. Chalpakni qavatlamoq. Gazetalarni qavatlab taxlamoq.

Arabxon begim shohi-atlas koʻrpachalardan ikkitasini tancha toʻriga qavatlab soldi. — Oybek, Ulugʻ yoʻl

2. Ip, kanop va shu kabilar narsalarning boʻlaklarini, qatlarini yonma-yon tizib, yondashtirib yoki bukib yoʻgʻonlashtirmoq.

Kanopni qavatlab eshmoq.

Safarxaltadan yoʻl uchun olingan ipni olti qavatlab pishitib, koʻrpa qaviq nina bilan kallani oʻz joyiga qoʻyib tika boshladik. — Gʻ. Gʻulom, Shum bola

1. Bir necha qavatdan, qatlamdan tashkil topgan, bir necha qavatga ega boʻlgan; qat-qat.

Qavat-qavat togʻ jinsi.

Duragaylarda dumba yogʻi badaniga urib ketadi. Qavat-qavat marmarni koʻrganmisan? Goʻshti oʻshanday bir qavat yogʻ, bir qavat goʻsht boʻladi. — S. Anorboyev, Oqsoy

2. Qavatlab taxlangan, terilgan yoki buklangan.

Qavat-qavat koʻrpa.

— Necha marta koʻrgansan, kelgan kuni koʻrsatdim-ku, — dedi Erali qavat-qavat qilib buklangan xatni serjantga uzatarkan. — I. Raxim, Chin muhabbat

3. Qator-qator tizilgan, tortilgan, yonma-yon turgan, qoʻyilgan (uzun va ingichka narsa yoki chiziqlar haqida).

Qavat-qavat qilib pishitilgan ip.

U yoʻlda borarkan, qavat-qavat tikanli simlar bilan oʻralgan sexlarning qoʻriqchilari undan propuska soʻray boshladilar. — I. Rahim, Chin muhabbat

fl. Qavatlamoq feʼlining majhul nisbati.

fl. Qavatlamoq feʼlining orttirma nisbati.

fl. Qavatlamoq feʼlining birgalik nisbati.