Qidiruv

1. Uzil-kesil belgilab qoʻyilgan, oʻzgarmaydigan; mustahkam, barqaror.

Qatʼiy baholar. Qatʼiy reja. Qatʼiy muddat.

U yerda batalon komandiri bilan birga qatʼiy jadval asosida mashgʻulot oʻtkazadilar. — Shuhrat, Shinelli yillar

Binokorlik ishlarini shunday yoʻlga qoʻyamizki, gʻoʻza parvarishiga sira xalal bermaydi. Faqat qatʼiy tartib oʻrnatishimiz kerak. — R. Fayziy, Choʻlga bahor keldi

2. Qayta koʻrish, oʻzgartirish, shart, pisanda, eʼtiroz va shu kabilarga yoʻl qoʻymaydigan; uzil-kesil.

Qatʼiy javob. Qatʼiy fikr. Qatʼiy qaror.

Qurʼoni sharif mayni makruh deb qatʼiy taqiqlagan. — P. Qodirov, Yulduzli tunlar

Suv isrofgarchiligiga, sugʻorishni sifatsiz oʻtkazishga qatʼiy barham berish kerak. — Gazetadan

3. Mustahkam, shak-shubhasiz, qattiq.

Qatʼiy vaʼda. Qatʼiy rioya qilmoq. Qatʼiy ishonch.

Men seni gʻoliblar qoʻlida koʻrib, Ozod kelajakka qatʼiy ishondim. — Uygʻun.

Haydar oʻz fikrida qatʼiy turib oldi. — Sh. Rashidov, Qudratli toʻlqin

4. Astoydil, jiddiy, qattiq.

U., qatʼiy tovush bilan intizom haqida gapirdi. — Oybek, Quyosh qoraymas

Qutidorning bu soʻzi juda ham qatʼiy edi. — A. Qodiriy, Oʻtgan kunlar

.suvsiz yotgan yer borki, hammasini oʻzlashtirishga qatʼiy bel bogʻlaganmiz. — Oʻzbekiston qoʻriqlari

Xoʻjayev rais kabinetidan rangi oʻchgan holda chiqdi. Ammo haqiqatdan koʻz yuma olmasligini qatʼiy turib aytdi. — Mushtum

rvsh. 1. Qatʼiy ravishda, butunlay.

Qatʼiyan man qilmoq. Qatʼiyan man qilmoq.

Shu minutdan boshlab [Elmurod] oʻz qaroridan qatʼiyan kechmoqchi va hammasini biryoʻla koʻnglidan chiqarib tashlamoqchi boʻldi. — P. Tursun, Oʻqituvchi

Bunday eʼtiborsizlikka qatʼiyan barham berish kerak. — N. Safarov, Olovli izlar

2. Sira ham, hech, mutlaqo.

Ularning harakatlaridan, yuzlaridan benihoyat charchaganliklari sezilib tursa ham, lekin dovdirash, hovliqish, parishonlik qatʼiyan koʻrinmasdi. — Oybek, Quyosh qoraymas

3. kam qoʻll. ayn. Qatʼiy 4.

Otinoyi bu safar oʻz qoidasini buzib, qatʼiyan tayinladi — P. Tursun, Oʻqituvchi

ot 1. kt. Oʻz fikrida, soʻzida, azm-u qarorida qattiq turish; qatʼiylik.

Qatʼiyat koʻrsatmoq.

Toʻlqinjon anqayib qoldi. U Huridan bunday qatʼiyatni va irodani sira kutmagan edi. — F. Musajon, Huri

Uning chehrasida, yupqa lablarida allaqanday bir qatʼiyat bor, harakatlari keskin, shiddatli edi. — O. Yoqubov, Izlayman

2. Sabr-toqat, matonat, iroda.

Harbiy xizmat oʻz xarakteriga koʻra yigitlardan qatʼiyatni talab qiladi. — Saodat

ot 1. Qatʼiy holat, qatʼiy holatga egalik, qatʼiy ekanlik.

Fikrning qatʼiyligi. Ishonchning qatʼiyligi. Maqsadning qatʼiyligi.

Tartibning erkinligi nisbiy boʻlganligi kabi, tartibning qatʼiyligi ham nisbiydir. — Gazetadan

Hafiza oʻz niyatida qatʼiyligi, maʼsum, begʻubor sevgisi bilan goʻzaldir. — O. Togʻayev, Umid romani haqida.

2. ayn. Qatʼiyat 1.

— Hamma ish muhim, -dedi Adolat qatʼiylik bilan, — ammo suv muhimroq. — I. Rahim, Chin muhabbat

Uning butun vujudida oʻziga ishonch, qatʼiylik sezilib turardi. — J. Abdullaxonov, Oriyat

sft. 1. Oʻz fikrida, soʻzida, azm-u qarorida qatʼiyat bilan turadigan; azmkor.

Qatʼiyatli xodim,

Avvaliga Hoshim Latifjonga ancha qatʼiyatli, rostgoʻy oʻrtoq sifatida tanilgan edi. — J. Abdullaxonov, Toʻfon

Mehribon ustoz Muhsin Qodirov oʻta talabchan, izlanuvchan va qatʼiyatli murabbiy. — Gazetadan

2. Matonatli, irodali.

sft. 1. Oʻz fikrida, soʻzida, azm-u qarorida qatʼiyat bilan turolmaydigan; beqaror.

2. Noaniq, betayin.

Bu toʻgʻrida qatʼiyatsiz, mujmal javoblar berishdan toʻyingan Raʼno Anvardan koʻz olmay turar edi. — A. Qodiriy, Mehrobdan chayon